«Շեռլոկի» ստեղծողները կնկարահանեն «Պատերազմ և խաղաղությունը»

Մեծ Բրիտանիայի BBC հեռուստառադիոկորպորացիան 2015 թվականի հունվարին Ռուսաստանում կսկսի ըստ Լև Տոլստոյի «Պատերազմ և խաղաղություն» վեպի հեռուստաֆիլմի նկարահանումները: Այս մասին, ինչպես տեղեկացնում է «Արմենպրես»-ը, ընկերությունը պաշտոնապես հայտարարել է իր կայքում: Ֆիլմի նկարահանման աշխատանքները տեղի կունենան նաև Լիտվայում և Լատվիայում:

Էկրանավորումը, որը բաղկացած կլինի վեց սերիայից՝ յուրաքանչյուրը մեկ ժամ տևողությամբ, BBC One-ով կցուցադրվի հաջորդ տարվա վերջին: BBC-ի առաջին հեռուստաալիքի ղեկավար Շառլոտա Մուրի խոսքով՝ ըստ Տոլստոյի վեպի սերիալը խոշոր իրադարձություն կդառնա ալիքի համար:

Սցենարի հեղինակն Էնդրյու Դևիսն է, որն էկրանի համար ադապտացրել է Ջեյն Օսթինի, Չառլզ Դիկենսի, Ուիլյամ Թեքերեյի ստեղծագործությունները և Բորիս Պաստեռնակի «Դոկտոր Ժիվագո» վեպը: Սերիալի բեմադրողը կդառնա բրիտանացի երիտասարդ ռեժիսոր Թոմ Հարփերը («Սևազգեստ կինը 2. Մահվան հրեշտակը»), իսկ պրոդյուսերը՝ Ֆեյթ Փեթհեյլը և Բեթան Ջոնսը՝ «Շեռլոկ» սերիալի ստեղծողներից մեկը:

Նատաշա Ռոստովայի դերը կխաղա բրիտանացի դերասանուհի Լիլի Ջեյմսը, որը հայտնի է «Դաունթոնի աբբայությունը» հեռուստասերիալից: Անդրեյ Բոլկոնսկու դերում կնկարահանվի բրիտանացի դերասան Ջեյմս Նորթոնը, որը հայտնի է Մայք Լիի՝ վերջերս նկարահանված «Ուիլյամ Թյոռներ» ֆիլմին իր մասնակցությամբ: Պիեռ Բեզուխովի դերը կխաղա ամերիկացի Փոլ Դանոն, որը «12 տարվա ստրկություն» ֆիլմում նկարահանվել է Հյուսն Ջոն Թիբիստի դերում:

BBC կորպորացիան վեպն արդեն էկրանավորել է 1972 թվականին: Սերգեյ Բոնդարչուկի 1965-1967 թվականների խորհրդային գեղարվեստական ֆիլմն ստացել է «Օսկար» մրցանակ օտար լեզվով լավագույն ֆիլմի համար: