Հաքերներին հաջողվել է լուսանկարներով պատճենել մատնադրոշմները

Chaos Computer Club (CCC) հայտնի հաքերական ցանցի անդամը պնդում է, որ իրեն հաջողվել է վերականգնել գերմանացի քաղաքական գործչի մատնադրոշմն այն լուսանկարների միջոցով, որոնք արվել են մամուլի ասուլիսի ժամանակ, տեղեկացնում է «Արմենպրես»-ը՝ հղում անելով BBC-ին:

Յան Քրիսլերը հայտարարել է, որ ինքը պատճենել է Գերմանիայի պաշտպանության նախարար Ուրսուլա ֆոն դեր Լյայենի մատնադրոշմն՝ օգտագործելով սովորական լուսանկարչական ապարատով արված լուսանկարները:

Նա այս մասին պատմել է CCC-ի՝ այն ցանցի անդամների համագումարում, որը գոյություն ունի արդեն 31 տարի և հավակնում է Եվրոպայում հաքերների խոշորագույն ընկերության կոչմանը:

Քրիսլերի խոսքով՝ ինքն օգտագործել է այն լուսանկարը, որտեղ նախարարի մատը նկարված է խոշոր պլանով, ինչպես նաև այլ լուսանկարներ, որոնք տարբեր անկյուններից արվել են հոկտեմբերին կայացած մամուլի ասուլիսի ժամանակ:

Քրիսլերը ենթադրել է, որ, իմանալով իր նվաճման մասին, քաղաքական գործիչները կարող են սկսել ձեռնոցներ հագնել՝ ելույթ ունենալով հանրության առջև: