Հայ ժողովուրդը հպարտ է իր ամուր բանակով. Հովիկ Աբրահամյան

ՀՀ վարչապետ Հովիկ Աբրահամյանն Ամանորի նախօրեին այցելեց Տավուշի մարզի սահմանամերձ Այգեհովիտ համայնք, որտեղ հանդիպեց տեղի բնակչության հետ: Կառավարության ղեկավարը շնորհավորեց բնակիչների գալիք Ամանորն ու Սուրբ ծնունդը և նշեց, որ սահմանամերձ համայնքները գտնվում են ՀՀ կառավարության ուշադրության կենտրոնում: «Կառավարությունն ամեն ինչ անելու է' սահմանամերձ համայնքների խնդիրները լուծելու համար: Մենք ջանք չենք խնայելու, որպեսզի դրանք հնարավորինս արագ լուծվեն և ստեղծվեն նաև նոր աշխատատեղեր: Դրան էր ուղղված նաև սահմանամերձ համայնքներում տնտեսավորողներին հարկերից ազատելու մեր որոշումը»,- «Արմենպրես»-ի հաղորդմամբ' ասաց Հովիկ Աբրահամյանը' վստահություն հայտնելով, որ հաջորդ տարվա ընթացքում այդ ուղղությամբ կլինեն արդյունքներ: Վարչապետը հորդորեց նաև տեղի բնակչությանը վստահությամբ շարունակել իրենց սահմանապահ առաքելությունը եւ նշեց, որ կառավարությունը շարունակելու է մշտապես լինել նրանց կողքին:

Այգեհովիտի բնակչությունը վարչապետի առջև բարձրացրեց դեպի գյուղ ձգվող ավտոճանապարհի հիմնանորոգման հարցը, ինչին ի պատասխան վարչապետը նշեց, որ կհանձնարարի ՀՀ տրանսպորտի և կապի նախարարությանն ուսումնասիրել խնդիրը և ներկայացնել դրա լուծման համապատասխան առաջարկ: Միաժամանակ, այգեհովիտցիները շնորհակալություն հայտնեցին Հովիկ Աբրահամյանին իրենց համայնքը սահմանամերձ համայնքների թվում ներառելու որոշման համար:

Վարչապետն այցելեց սահմանապահ դիրքեր, որտեղ ծանոթացավ առկա իրավիճակին և զինվորների սոցիալ-կենցաղային պայմաններին: Վարչապետը զրուցեց նաև զինվորների հետ, ծանոթացավ սահմանի իրավիճակին և զինծառայության ընթացքում լավագույնս աչքի ընկած մի քանի զինծառայողների հանձնեց հուշանվերներ:

Հովիկ Աբրահամյանը լրագրողների հետ զրույցում նշեց, որ հայ ժողովուրդը հպարտ է իր ամուր բանակով, որը լավագույնս իրականացնում է հայրենիքի պաշտպանությունն ու անվտանգությունը:

Վարչապետը հիշեցրեց ընթացիկ տարվա օգոստոսին սահմանագծում ստեղծված լարվածությունը և փաստեց, որ այդ ընթացքում ինչպես բանակը, այնպես էլ ժողովուրդը ամուր և կուռ էին, ինչպես նաև տիրում էր միասնականություն: