Նորանկախ պետության ձեռքբերումը՝ բանակը

2014-ին կային բազմաթիվ մարտահրավերներ` հատկապես արտաքին մարտահրավերներ: Այն իրավիճակը, որն այսօր կա, կարելի է գնահատել դրական: Լուրեր.com-ի հետ զրույցում, ամփոփելով 2014 թվականը, ասաց ԱԺ ՀՀԿ-ական պատգամավոր Հովհաննես Սահակյանը:

«Մեր նորանկախ պետության ձեռքբերումներից մեկը՝ բանակը, այսօր կանգուն է և կարողանում է պաշտպանել մեր ժողովրդին: Հայոց երկրորդ հանրապետությունը՝ Արցախը, օր օրի էլ ավելի է զարգանում, հզորանում, թե՛ ինստիտուցիոնալ առումով, և թե՛ տնտեսապես:

Մենք տեսնում ենք, որ արտաքին հարաբերություններում, դիվանագիտական գործողությունների մեջ հետընթաց չունենք Արցախի հետ կապված, ասեմ ավելին՝ ունենք առաջընթաց: Ներքին քաղաքականության մեջ քաղաքացիական հասարակության կայացման ճանապարհին ունենք լուրջ ձեռքբերումներ մարդու իրավունքների, խոսքի ազատության ոլորտում:

Մեր քաղծառայողների աշխատավարձերն այս տարի բարձրացան, դա ևս համարենք ձեռքբերում, թեպետ կան որոշակի սոցիալական խնդիրներ, տնտեսական ճգնաժամից հետո որոշակի լարվածություն, բայց կարծում եմ դրանք բոլորը հաղթահարելի են»,- ասաց Սահակյանը:

Խոսելով բացթողումների մասին, Սահակյանի կարծիքով, թերևս միակ բացթողումը կամ ոչ դրական քայլը, դա ներքաղաքական և արտաքին որոշ ուժերի կողմից ձևավորվող մթնոլորտն է:

«2015-ը թող լինի մեզ համար լավ, իրար օգնելու տարի, որի ընթացքում էլ մենք կարող ենք արձանագրել շոշափելի ձեռքբերումներ»,- ասաց Սահակյանը: