Ձնածածկույթը Գեղարքունիքում արդեն հասնում է 15-20 սանտիմետրի

Հայաստան 8 Հունվար, 2015 16:20

Արդեն երրորդ օրն է, ինչ բքերի և ձյան տեղումների պատճառով դժվարանցանելի կամ անանցանելի վիճակ է առաջացել Գեղարքունիքի մարզի միջպետական, հանրապետական կամ միջհամայնքային նշանակության որոշ ճանապարհներին: Ինչպես «Արմենպրես»-ին տեղեկացրեց Գեղարքունիքի մարզպետարանի աշխատակազմի քաղաքաշինության վարչության տրանսպորտի և ճանապարհաշինության բաժնի վարիչ Գևորգ Խաչատրյանը, հունվարի 6-ից բքերի պատճառով փակվել են Վարդենիս-Այրք, Ծովակ-Ախպրաձոր ճանապարհները: Ծովակ-Ախպրաձոր ուղղությունում հունվարի 7-ին իրականացվել են մաքրման աշխատանքներ, սակայն այս գիշեր սկսված և օրվա ընթացքում շարունակվող ձյունն ու բքերը կրկին անհնար են դարձրել տրանսպորտային երթևեկությունը:

Հունվարի 7-ի առավոտվանից փակվել է նաև Վարդենյաց լեռնանցքը: Մարտունի-Գետափ միջպետական նշանակության ճանապարհը սպասարկող «Շանթ-Սեյրան» ՍՊԸ ներկայացուցչի հաղորդման համաձայն' հունվարի 7-ի ողջ օրվա ընթացքում երթևեկությունը Վարդենյաց լեռնանցքում վերականգնելու համար ձեռնարկվել են միջոցառումներ, ձյան արգելափակումից դուրս են բերվել մեքենաներ, սակայն շարունակվող ձյունն ու ձնամրրիկները նորից անհնար են դարձրել երթեկությունը, և հունվարի 8-ի առավոտվանից ճանապարհը սպասարկող կազմակերպությունները երկկողմանի' Մարտունու և Եղեգնաձորի մուտքերում արգելել են տրանսպորտային հաղորդակցությունը ժամանակավորապես:

«Հիմնականում անանցանելի է Ծաղկաշեն յայլաղատեղից մինչև Սելիմի քարավանատուն ընկած մոտ հինգ կիլոմետրանոց հատվածը, որտեղ ձյան բարձրությունը հասնում է մեկ մետրի: Ճանապարհի մաքրման աշխատանքները կսկսենք միայն բքերի դադարեցումից հետո: Իսկ առայժմ, ելնելով մարդկանց անվտանգության ապահովումից, մարզային փրկարար ծառայության հետ համատեղ դադարեցրել ենք երթևեկությունը Մարտունի-Գետափ ուղղությունում: Վերին Գետաշեն-Մադինա ավտոճանապարհի երթևեկությունն առայժմ հաջողվում է պահպանել»,- նշեց «Շանթ-Սեյրան» ՍՊԸ ներկայացուցիչ Աղասի Ղուկասյանը:

Հունվարի 8-ի հետկեսօրին ձնածակույթը Գեղարքունիքում արդեն կազմում է տասնհինգից քսան սանտիմետր: Շարունակվող տեղումների արդյունքում ճանապարհներին պահպանվում է թույլ տեսանելիությունը և դժվարանցանելի վիճակը: Ճանապարհաշինարարական կազմակերպությունները բոլոր ուղղություններում իրականացնում են ճանապարհների մաքրման և մշակման աշխատանքներ: