Գեղարքունիքում փրկարարները ձյան արգելանքից դուրս են բերել 27 ավտոմեքենա

Գեղարքունիքի մարզի ճանապարհներին տեղացած ձյան և բքերի հետևանքով հունվարի 8-ին և 9 -ին ձյան մեջ իրենց ուղևորներով արգելափակվել է 27 ավտոմեքենա, որոնց հաջողվել է դուրս բերել ՀՀ տարածքային կառավարման և ԱԻՆ Գեղարքունիքի մարզային փրկարար ծառայության ուժերով: Ինչպես «Արմենպրես»-ին տեղեկացրին փրկարար ծառայության հերթապահ մասից, հունվարի 8-ի և 9-ի ընթացքում Սոթք-Քարվաճառ ավտոճանապարհին փրկարաները ձյան կապանքներից դուրս են բերել արգելափակցած քսան, Գավառ քաղաքում՝ երեք, Վանևան գյուղում՝ մեկ, Նորատուսի գերեզմանոցի մոտ՝ մեկ, Զոլաքարում՝ մեկ, Գավառ-Մարտունի մայրուղում՝ մեկ ավտոմեքենա:

Եվս մեկ ավտոմեքենա արգելափակվել է Մաքենիս-Ախպրաձոր ճանապարհին, որը դուրս բերելու համար փրկարաները դիմել են ճանապարհը սպասարկող «Կապավոր» ՍՊԸ Վարդենիսի գրասենյակի օգնությանը: Հունվարի 9-ի երեկոյան ժամը19-ի դրությամբ մարզում շարունակվում են ձյան տեղումները և հաճախակի մոլեգնող բքերը: Նույն պահի դրությամբ փակ են մնում Սոթք-Քարվաճառ , Մարտունի-Գետափ և Ծովակ-Ախպրաձոր ճանապարները: Մնացած ուղղություններում ճանապարհներին հիմնականում պահպանվում է դժվարանցանելիությունը և մերկասառույցը:

Փրկարար ծառայությունն ահազանգ է ստացել Ծովակ գյուղից այն մասին, որ երկու ծովակցիներ նախորդ օրը լճի վրա դուրս են եկել ձկնորսության և չեն վերադարձել: Բարեբախտաբար, մինչև փրկարարների ժամանումը ձկնորսները սեփական ուժերով ափ են դուրս եկել: