Ադրբեջանի ՊՆ-ն հուսահատ ճիգեր է գործադրում հերքելու հունվարի 11-ի կորուստները

Ադրբեջան 13 Հունվար, 2015 1:25

Ադրբեջանի պաշտպանության նախարարությունը հասարակությունից թաքցնելու հուսահատ ճիգեր է գործադրում հունվարի 11-ին ղարաբաղա-ադրբեջանական հակամարտ զորքերի շփման գծում և հայ-ադրբեջանական պետական սահմանի Բաղանիս գյուղի հատվածում կատարած դիվերսիոն փորձերի ժամանակ ունեցած կորուստները սեփական հասարակությունից թաքցնելու համար:

Ինչպես հաղորդում է «Արմենպրես»-ը, օգոստոսյան հայտնի դեպքերի ժամանակ ունեցած տասնյակ կորուստներից հետո Ադրբեջանի նախագահ Իլհամ Ալիևի հանձնարարությամբ ԶԼՄ-ների կողմից բանակում կորուստների մասին տեղեկությունների տարածումն արգելվելուց հետո, Ադրբեջանի ՊՆ մամուլի ծառայության ղեկավար Վագիֆ Դերգահլըն իրեն հատուկ ջանադրությամբ հերքում է սեփական զինված ուժերի բոլոր անհաջող դիվերսիոն հարձակումները և հայ դիրքապահների հակահ արվածներից ունեցած կորուստները:

Ադրբեջանական մամուլի համար արած հայտարարության մեջ Դերգահլըն նույն ջանադրությամբ հերքել է նաև հունվարի 11-ին Բաղանիսից 1,5 կմ հեռավորության վրա հակառակորդի դիվերսիոն խմբի մեկ անդամի դիակը միջդիրքային տարածքից հանելու համար, միջազգային մարդասիրական նորմերից ելնելով, ՀՀ ԶՈւ ստորաբաժանումներից կողմից թույլատրվելու մասին ՀՀ ՊՆ մամուլի քարտուղար Արծրուն Հովհաննիսյանի ֆեսյբուքյան գրառումը: Դերգահլըն հերքել է նաև անհաջող դիվերսիոն հարձակումներից հետո շփման գծի երկայնքով Ադրբեջանի ԶՈւ կողմից անօդաչու սարքեր գործողության մեջ դնելու մասին ՀՀ ՊՆ հաղորդագրությունը, որը հաղորդել են ադրբեջանական բոլոր առաջատար ԶԼՄ-ները:

Ադրբեջանական կողմի այդ ջղաձիգ հայտարարությունները խոսում են այն մասին, որ Բաքվի իշխանություններն այլևս ի զորու չեն շարունակել հայկական ուժերի նկատմամբ թվացյալ առավելություն ունենալու մասին հորինած և սեփական ու միջազգային հանրությանը մոլորեցնելուն ուղղված գործողությունները:

Արծրուն Հովհաննիսյանը հունվարի 11-ին կատարվածի մասին ավելի վաղ իր ֆեյսբուքյան էջում գրել էր. «Հակառակորդի ստորաբաժանումների առաջխաղացումը ժամանակին հայտնաբերվել է: Հայոց բանակի արագ արձագանքման համապատասխան ստորաբաժանումը դարանակալել և չեզոքացրել է Հայաստանի պետական սահմանը խախտած դիվերսիոն խմբի գործողությունները: Հակառակորդի դիվերսիոն խմբի մի անդամի դիակը գտնվում է միջդիրքային հատվածում: Ցավոք, փոխհրաձգության ընթացքում զոհվել է նաև տարածքում գտնված հովիվ Սերյոժա Նիկոլայի Սարգսյանը (ծնված 1935 թ.):