Թբիլիսիի կենտրոնում այրվել է Մելիք Ազարյանցի պատմական տան մի մասը

Լույս հունվարի 13-ի գիշերն այրվել է Թբիլիսիի Ռուսթավելիի պողոտայում գտնվող ամենագեղեցիկ պատմական շենքերից մեկի մի մասը, շենք, որը կրում է դրա ստեղծողի՝ թբիլիսցի հայազգի վաճառական Ալեքսանդր Մելիք Ազարյանցի անունը, տեղեկացնում է «Արմենպրես»-ը:

Շենքը կառուցվել է 1912-1915 թվականներին պետերբուրգցի ճարտարապետ Նիկոլայ Օբոլենսկու նախագծով: Մելիք Ազարյանցի տունը գտնվում է Ռուսաթավելիի պողոտայի թիվ 37 հասցեում:

«Թեժ գծին հեռախոսազանգը ստացվել է ժամը 02:56-ին: Հրդեհի հետևանքով այրվել է 5-հարկանի շենքի առաջին հարկը: Այրվել են վերելակի հորանը և տանիքը: Այրվել է մոտավորապես 250-300 քառակուսի մետր տարածք»,- «Նովոստի Գրուզիա»-ին հայտնել է Թբիլիսիի քաղաքապետարանի արտակարգ և անհետաձգելի իրավիճակների կառավարման գործակալության մամուլի ծառայության աշխատակցուհին: Հրդեհը հաջողվել է տեղափակել ժամը 03:57-ին: Տեղում աշխատել է 16 հրշեջ բրիգադ:

Միջադեպի հետևանքով ոք ոք չի տուժել: Հրդեհի ժամանակ շենքում եղել է մեկ ընտանիք, որը ժամանակին տարհանվել է: Մինչդեռ զգալի վնաս է պատճառվել շենքի առաջին հարկում գտնվող առևտրային օբյեկտներին:

Հրդեհի ստույգ պատճառներն առայժմ հայտնի չեն: Վարկածներից մեկի համաձայն՝ կրակը շենքի վրա է տարածվել այրվող աղբարկղից:

Կատարվում է հետաքննություն: