ՀՅԴ-ն խորությամբ ուսումնասիրել է սահմանադրական բարեփոխումների հայեցակարգը և ձևակերպել սեփական առաջարկները

Հայաստանում սահմանադրական բարեփոխումների իրականացման հայեցակարգը ձևակերպել է կարևորագույն խնդիրներ, որոնք միշտ եղել են ՀՅԴ-ի հիմնական մոտեցումները:

Այս մասին հունվարի 13-ին կայացած մամուլի ասուլիսի ընթացքում հայտարարեց ԱԺ ՀՅԴ խմբակցության քարտուղար Աղվան Վարդանյանը: «Հայեցակարգում ձևակերպվել է կարևորագույն խնդիր՝ հաղթահարել քաղաքական մենիշխանությունը, բարեփոխումներով երաշխավորել իշխանության ընտրովիությունը, հաշվետվողականությունը և փոփոխելիություն, քաղաքացիական հասարակությանն ակտիվ դերակատարություն վերապահել իշխանության գործունեության նկատմամբ հանրային վերահսկողություն իրականացնելու հարցում»,- «Արմենպրես»-ի հաղորդմամբ՝ նշեց Վարդանյանը:

Նա ընդգծեց, որ հայեցակարգում արժևորվել են ՀՅԴ նախկինում հրապարակված տեսակետները, որոնք ընդհանուր առմամբ ներառված են հայեցակարգում: «Մենք մեզ քաղաքական պատասխանատու ուժ ենք համարում, և եթե մի բան գտնում ենք, որ ճիշտ է, մենք դա անում ենք: Մենք անելու ենք մեր անելիքը՝ անկախ նրանից, թե կողքից ինչ են խոսելու»,- ընդգծեց պատգամավորը:

Աղվան Վարդանյանն անդրադարձավ նաև դիտարկմանը, թե սահմանադրական բարեփոխումներ նախաձեռնելով' իշխանությունները փորձում են վերարտադրման մեխանիզմներ ստեղծել: Նա նկատեց, որ իշխանությունների համար վերարտադրման շատ լավ մեխանիզմներ կան գործող համակարգում, իսկ առաջարկվող բարեփոխումները սահմանափակելու են իշխանությունների վերարտադրման հնարավորությունները:

ԱԺ ՀՅԴ խմբակցության ղեկավար Արմեն Ռուստամյանն ընդգծեց, որ սահմանադրական բարեփոխումների հայեցակարգով առաջադրվող լուծումներն ընդհանուր առմամբ կարող են նպաստել ժամանակակից սոցիալական, իրավական և ժողովրդավարական պետության կառուցմանը՝ ապահովելով քաղաքացու հիմնական իրավունքների իրացումը: «Մենք միշտ ասել ենք, որ երկրում պետք է իրականացվեն իրական և համակարգային փոփոխություններ: Իսկ այդ փոփոխություններին մենք կարող ենք հասնել միայն սահմանադրական բարեփոխումների իրականացման եղանակով: Մենք ցանկանում ենք, որպեսզի լինի այնպիսի մի համակարգ, որ մեր քաղաքացիներն իրենց իրավունքների տերը լինեն, որոնք կերաշխավորվեն ՀՀ սահմանադրությամբ»,- ընդգծեց Ռուստամյանը:

Ռուստամյանը տեղեկացրեց, որ ՀՅԴ-ն խորությամբ ուսումնասիրել է սահմանադրական բարեփոխումների հայեցակարգը և դրա շուրջ ձևակերպել իր մոտեցումներն ու գնահատականները: «Մենք այդ փաստաթղթով էլ գնալու ենք սահմանադրական բարեփոխումների հայեցակարգի վերաբերյալ քաղաքական կոնսուլտացիաներին և փորձելու ենք առաջ տանել մեր գաղափարներն ու մոտեցումները, քննարկելու ենք մեր առաջարկներն իշխանությունների հետ: Մենք ունենք առաջարկներ, որոնք հաշվի առնելու դեպքում կկարողանանք ունենալ մեխանիզմներ, որոնք կհակակշռեն և կզսպեն իշխանություններին, նախադրյ ալներ կստեղծեն երկրում ընտրությունների միջոցով իշխանափոխություն իրականացնելու համար: Այսօր գործող համակարգը թույլ չի տալիս, որ մենք ընտրությունների միջոցով իշխանափոխություն իրականացնենք: Հայաստանում նման բան չի եղել, ուստի սա ոչ միայն անձի, այլև համակարգի հետ կապված խնդիր է»,- նշեց նա:

Ռուստամյանի խոսքով՝ իրենք պատրաստ են հայեցակարգի վերաբերյալ իրենց մոտեցումները ևս դնել քննարկման, լսել առաջարկներ և լրացնել դրանք՝ ավելի արդյունավետ դարձնելու համար: «Մենք պատրաստ ենք բոլոր քաղաքական ուժերի հետ քննարկել մեր մոտեցումները: Պատրաստ ենք լսել նոր առաջարկներ, լրացնել, միասին պահանջել իշխանություններից իրականացնել առաջարկվող փոփոխությունները: Բոլորն էլ ասում են, որ իրենք արյունահեղություն չեն ցանկանում: Եթե չեք ցանկանում, ապա միակ ճանախարհը սա է: Եկեք միասին աշխատենք, միասին մշակենք մեր մոտեցումները և գնանք առաջ»,- նշեց Ռուստամյանը:

Պատգամավորը կարևորեց այն հանգամանքը, որ սահմանադրական բարեփոխումների հայեցակարգում առաջարկվում է անցում կատարել կառավարման խորհրդարանական համակարգին: Նա ընդգծեց, որ սրանով ավելի մեծանալու է ընդդիմադիր պայքարի հնարավորությունը, պայմաններ են ստեղծվելու, որպեսզի երկրի համար կարևոր որոշումները կախված չլինեն միայն մեկ անձից:

ՀՅԴ խմբակցության ղեկավարն ընդգծեց, որ համակարծիք լինելով սահմանադրական մի շարք նոր ինստիտուտների ներմուծման հայեցակարգային առաջարկություններին՝ իրենք գտնում են, որ հայեցակարգի մի շարք մոտեցումներ ու լուծումներ առավել հստակեցման կարիք ունեն և պետք է իրացվեն սահմանադրության տեքստում, ինչի վերաբերյալ իրենք մշակել են իրենց մոտեցումները և այդ փաստաթղթով էլ մտնելու են քաղաքական կոնսուլտացիաների փուլ: