Կառավարությունը կազմել է հարկային արտոնություններից օգտվող սահմանամերձ համայնքների ցանկը

Հայաստանի կառավարությունը կհաստատի մարտական գործողությունների հետևանքով չօգտագործվող հողատարածք­­ներ ունեցող այն սահմանամերձ գյուղական համայնքների ցանկը, որտեղ իրա­կա­նաց­վող գործունեությունն ազատվում է հարկերից: «Արմենպրես»-ի փոխանցմամբ' նախագիծն ընդգրկված է կառավարության հունվարի 15-ի նիստի օրակարգում:

Ցանկում ընդգրկվել են Արարատի մարզի Երասխ, Վայոց Ձորի Խաչիկ, Խնձորուտ, Սերս, Նոր Ազնաբերդ, Բարձրունի, Գեղարքունիքի Վահան և Տավուշի մարզի Ներքին Կարմիր աղբյուր, Ոսկեվան, Չորաթան, Կողբ, Վազաշեն, Բերքաբեր, Չինարի, Արծվաբերդ, Ծաղկավան (Իջևանի շրջան), Մոսեսգեղ, Դովեղ, Պառավաքար, Բերդավան, Բարեկամավան, Կոթի, Բաղանիս, Սարիգյուղ, Այգեձոր, Կիրանց, Այգեպար, Սևքար, Այգեհովիտ, Ոսկեպար և Վերին Կարմիր աղբյուր համայնքները:

Նախագծի նպա­տակը «Սահ­մա­նամերձ գյուղական համայնքներում իրականացվող գործու­նեությունը հարկերից ազա­տելու մասին» ՀՀ օրենքի կիրարկումն ապահովելն է:

2015 թվա­­­­կանի հունվարի 1-ից ուժի մեջ է մտել «Սահմանամերձ գյուղական համայնքներում իրա­­կանացվող գործու­նեությունը հարկերից ազատելու մասին» ՀՀ օրենքը, որի համա­ձայն, ՀՀ կառա­վա­րու­­թյան կողմից հաստատված ցանկում ներառված՝ մարտական գործողությունների հետևանքով չօգտագործվող հողատարածքներ ունե­ցող սահ­մանամերձ գյու­ղա­­կան համայնք­նե­րում իրա­կա­նացվող գործունեու­թյունն ազատվում է հար­­կե­րից:

Միաժամանակ, վերը նշված համայնքների բնակիչները կօգտվեն նաև ՀՀ կառավարության տարբեր արտոնություններից, մասնավորապես, նրանք կազատվեն հողի հարկից և ոռոգման ջրի վարձից, և կվճարեն օգտագործած գազի ու էլեկտրաէներգիայի վարձի միայն կեսը: