Հայ հաքերները միաժամանակ «սպիտակ» և «սև» գլխարկավորներ են

Հայ հաքերները յուրահատուկ են նրանով, որ իրենք և' պիտակ, և' սև գլխարկավորներ են: Նրանք ինչպես օգնում են հայրենի կայքերի անվտանգության ապահովման հարցում, այնպես էլ, կոտրում են ադրբեջանական կայքերը: Այս մասին հունվարի 13-ին լրագրողներին տեղեկացրեց տեղեկատվական անվտանգության փորձագետ Սամվել Մարտիրոսյանը:

«Հակերային համայնքները հիմնականում երկու խմբի են՝ «սպիտակ գլխարկավորների» և «սև գլխարկավորների»: «Սպիտակ գլխարկավորները» գործում են ուրիշներին օգնելու համար. իրենք, կոտրելով կայքերը, գտնում են դրանց մեջ առկա թույլ հատվածները, նամակ են գրում կայքի տիրոջը, որպեսզի վերջինս շտկի իր կայքում առկա բացերը: Իսկ «սև գլխարկավորները» ուղղակի փչացնում են կայքը: Ի դեպ, նման երևույթը ձևավորվել է անցած տարվա ընթացքում», - նշեց Սամվել Մարտիրոսյանը:

Փորձագետի գնահատմամբ՝ ցավոք, օրենսդրորեն այս խնդիրը վատ է կանոնակարգվում, քանի որ այդ մարդկանց ամեն պահ կարող են ձերբակալել զուտ կայքը ստուգելու համար:

«Հայ հաքերների մեծամասնությունը մարզերից է, ովքեր, կոտրելով ադրբեջանական կայքեր՝ մի քանի տվյալների բազաներ են լցրել ցանց: Վերջին շրջանում մեծ քանակությամբ ադրբեջանական կայքեր կոտրվեցին և դրանց տեղեկատվական շտեմարանները տեղադրվեցին համացանցում, ներառյալ` ադրբեջանական պետական կառույցների կայքերում տեղակայված տեղեկատվությունը», - հայտնեց Սամվել Մարտիրոսյանը:

Նա հավելեց, որ հիմնականում հայ ակտիվ հաքերները կոտրում են երկրորդական կարևորության կայքեր, իսկ արդեն բարձրակարգարգ հաքերները երկու կողմերից ակտիվանում են քաղաքական առավել սրված իրավիճակներում: