Հոգեհանգստի ծառայություն մատուցելու գործընթացը կկանոնակարգվի

Հայաստանի կառավարությունը մի շարք օրենքների նախագծերում փոփոխություններ կատարելով կկանոնակարգի հոգեհանգստի ծառայության իրականացման հետ կապված հարաբերությունները: Կսահմանվեն նաև նշված ծառայության իրականացման համար համապատասխան թույլտվության տրամադրումը, մատուցվող ծառայությանը ներկայացվող պահանջները, իրականացման վայրերը և տեղական տուրքը, ինչպես նաև վարչական պատասխանատվություն՝ առանց թույլտվության գործու նեություն իրականացնելու դեպքերը կանխելու համար:

«Արմենպրես»-ի փոխանցմամբ՝ օրենքների նախագծերին հավանություն տալու մասին հարցն ընդգրկված է ՀՀ կառավարության հունվարի 15-ի նիստի օրակարգում:

Միաժամանակ դրանց տեղակայման վայրերը և նշված ծառայություններին ներկայացվող պահանջները սահմանելու լիազորությունն առաջարկվում է վերապահել համայնքի ավագանուն՝ ելնելով տեղական պայմաններից, համայնքի առանձնահատկություններից և սովորույթներից:

Ակնկալվում է կանոնակարգել հոգեհանգստի ծառայության իրականացման հետ կապված հարաբերությունները, ինչի արդյունքում կվերանա նաև քաղաքացիների դժգոհությունը:

«Երևան քաղաքի վարչական տարածքում առկա են մեկ տասնյակից ավելի վայրեր, որտեղ մատուցվում են հոգեհանգստի հետ կապված ծառայություններ: Դրանց մի մասը գտնվում է քաղաքի բանուկ հատվածներում, բազմաբնակարան շենքերի և դպրոցների հարևանությամբ, ինչն առաջացրել է բնակիչների արդարացված դժգոհությունը: Տվյալ խնդիրը կարգավորելու խնդրանքով Երևանի քաղաքապետարան են ներկայացվել բազմաթիվ դիմում-բողոքներ՝ համապատասխան միջոցներ ձեռնարկելու և այդ հաստատությունները բազմաբնակարան շենքերին, իրենց բնակելի տներին և դպրոցներին հարակից տարածքներից այլ վայրեր տեղափոխելու խնդրանքով»,- նշված է նախագծի հիմնավորման մեջ: