«Ժողովուրդ». Երվանդ Զախարյանը երեկ հերթական «աչքալուսանքն» է տվել

ՀՀ էներգետիկայի և բնական պաշարների նախարար Երվանդ Զախարյանը երեկ հերթական «աչքալուսանքն» է տվել ՀՀ քաղաքացիներին' հայտարարելով, թե առաջիկայում հնարավոր է էլեկտրաէներգիայի սակագների նոր թանկացում: Գրում է «Ժողովուրդ»-ը:

Նա, իհարկե, կոնկրետ ժամկետ կամ թանկացման չափ չի նշել, սակայն փոխարենը ներկայացրել է հնարավոր թանկացման պատճառը: «էլեկտրաէներգիա մատակարարող «Հայաստանի էլեկտրական ցանցեր» ընկերությունը մեծ պարտքեր է կուտակել: 2015 թվականի հունվարի 1-ի դրությամբ էլցանցերի պարտքը կազմել է 15,8 միլիարդ դրամ, այդ թվում՝ ժամկետանց պարտքը' 7,8 միլիարդ դրամ: Ընկերությունը միլիոնավոր դոլարներ էլ պարտք է առևտրային բանկերին: Այս պահի դրությամբ բանկերին պարտքը կազմում է 220 միլիոն դոլար»,-ներկայացրել է Զախարյանը:

Փաստորեն ՀԷՑ-ի ապաշնորհ կառավարիչների կուտակած պարտքերը ՀՀ քաղաքացիների հաշվին թեթևացնելու նպատակով անցած ամռանը կատարված էլէներգիայի սակագնի 27 տոկոսով թանկացումը բավարար չի եղել վիճակը շտկելու համար, և առաջիկայում հայաստանցի սպառողները հերթական անգամ ստիպված են լինելու իրենք վճարել ռուս կառավարիչների փոշիացրած գումարները: Եվ պարզապես ցնցող է նախարարի տված պատասխանը լրագրողների հարցին, թե ինչու, այս խայտառակ պատկերն աչքի առջև ունենալով, չեն փոխում ՀԷՑ-ի վատ կառավարչին: «Հայաստանը որևէ կապ չունի, էլցանցերի սեփականատեր «Ինտեր ՌԱՕ ԵԷՍ»-ը պետք է որոշի' ով կառավարի»: Ահա, այսպես՝ փաստորեն Զախարյանն արձանագրում է առանց այդ էլ հայտնի իրողությունը, որ Հայաստանի Հանրապետությունը, որպես այդպիսին, չունի ռուսական ընկերության վրա ազդեցության և ոչ մի լծակ:

Շարունակությունը՝ թերթի այսօրվա համարում։