2004 BL86 աստղակերպը Երկրին կմոտենա հունվարի 26-ին. NASA

2004 BL86 ոչ մեծ աստղակերպը՝ 500 մետր տրամագծով և 157 միլիոն տոննա զանգվածով, Երկրին կմոտենա այս տարվա հունվարի 26-ին՝ վտանգ չներկայացնելով մեր մոլորակի համար և թռչելով Լուսնից մինչև Երկիր երեք տարածություն հեռավորության վրա: Այդ մասին, ինչպես տեղեկացնում է «Արմենպրես»-ը, հայտնել է Փասադենայում NASA-ի Ռեակտիվ շարժման լաբորատորիայի մամուլի ծառայությունը:

«Դեկտեմբերի 26-ին 2004 BL86 աստղակերպը Երկրին կմոտենա այնպիսի հեռավորությամբ, որով նա մեր մոլորակին չի մոտեցել վերջին առնվազն 200 տարվա ընթացքում: Ու թեև այն մոտ ապագայում ոչ մի կերպ չի սպառնում Երկրի անվտանգությանը, խոշոր աստղակերպի այդքան մոտիկ անցումը մեզ բացառիկ հնարավորություն է ընձեռում դիտարկել այն, ուսումնասիրել դրա մակերևույթը և նոր բաներ իմանալ»,- լրագրողներին պարզաբանել է երկրամերձ օբյեկտների ծրագրի տնօրեն Ջոն Եմանսը Ռեկատիվ շարժման լաբորատորիայից:

Ըստ ՌԻԱ Նովոստիի՝ նա ասել է, թե NASA-ն կփորձի աստղակերպը «ճառագայթահարել» միկրոալիքային ճառագայթման միջոցով՝ ստանալու աստղակերպի բարձր ճշգրտության լուսանկարներ և 3D-մոդելը, ինչպես նաև ուսումնասիրելու դրա ներքին կառուցվածքը և այդ երկնային մարմնի տարբեր հատվածների խտությունը: Այսօրվա դրությամբ, ինչպես նշել է Լաբորատորիայի մեկ այլ ներկայացուցիչ՝ Լանս Բեները, աստղագետները գործնականում ոչինչ չգիտեն այդ երկնային մարմնի կառուցվածքի և նկարագրի մասին: