Բողոքի ակցիաներ՝ նախագահական նստավայրի և ՀՀ-ում ՌԴ դեսպանատան դիմաց. պահանջում են Պերմյակովին հանձնել հայ իրավապահներին

Մի շարք քաղաքացիներ բողոքի ակցիա են անցկացնում ՀՀ նախագահական նստավայրի դիմաց: Նրանք պահանջում են Վալերի Պերմյակովին հանձնել հայ իրավապահներին:

Նշենք նաև, որ բողոքի ակցիա է ընթանում նաև Հայաստանում Ռուսաստանի դեսպանատան դիմաց: Պահանջը կրկին նույնն է՝ մեղադրյալին հանձնել ՀՀ իրավապահ մարմիններին:

Հիշեցնենք, որ հունվարի 12-ին դաժան սպանություն է տեղի ունեցել Գյումրիում: Սպանվել է նույն ընտանիքի վեց անդամ:

Մահացել են Սերյոժա Կարապետի Ավետիսյանը (ընտանիքի հայրը), Հասմիկ Ռաֆիկի Ավետիսյանը (ընտանիքի մայրը), Արմեն Սերյոժայի Ավետիսյանը (նրանց որդին), Արաքս Անդրանիկի Ավետիսյանը (ընտանիքի հարսը), Աիդա Սերյոժայի Ավետիսյանը (դուստրը), Հասմիկ Արմենի Ավետիսյանը (2 տարեկան երեխա): Ընտանիքի յոթերորդ անդամը՝ վեցից ութ ամսական Սերյոժա Արմենի Ավետիսյանը հիվանդանոցում է:

Ընտանիքի վեց անդամի սպանության մեջ կասկածվողը ռուս զինվորական Վալերի Պավելի Պերմյակովն է, ում ռուս սահմանապահները ձերբակալել են հայ-թուրքական սահմանի մոտ:

Հանցագործության կատարման մեջ կասկածվող Վալերի Պավելի Պերմյակովը ՌԴ քաղաքացի է և գտնվում է ՌԴ իրավապահների հսկողության՝ նույնն է՝ ՌԴ իրավազորության ներքո: Վ. Պերմյակովին ՀՀ իրավապահներին հանձնելու հարց չի քննարկվում:

Ավտոերթի մասնակիցները պահանջում են կասկածյալին հանձնել հայ իրավապահներին:

Քննությունը վարում են ՀՀ և ՌԴ իրավապահ մարմինները: Քննությունն իրականացվելու է ՀՀ և ՌԴ իրավապահ մարմիների ակտիվ իրավական փոխգործակցությամբ: