Սեմ Սմիթն առաջատարն է BRIT Awards երաժշտական մրցանակի անվանակարգերի թվով

Լոնդոնում հայտարարվել են BRIT Awards հեղինակավոր երաժշտական մրցանակի անվանակարգորդները: Պարգևների հանձնման 35-րդ արարողությունը կկայանա փետրվարի 25-ին Մեծ Բրիտանիայի մայրաքաղաքի O2 արենայում, տեղեկացնում է «Արմենպրես»-ը:

Սեմ Սմիթը ներկայացված է հինգ կատեգորիաներում, որոնց թվում են «լավագույն բրիտանացի կատարող», «տարվա ճեղքում», «լավագույն բրիտանական սինգլ», «լավագույն բրիտանական տեսահոլովակ», ինչպես նաև «լավագույն բրիտանական ալբոմ» անվանակարգերը: Ուշագրավ է, որ անցյալ տարի Սմիթը հաղթել էր «քննադատների ընտրությունն» անվանակարգում:

Իրենց հերթին, նրա գործընկերներ Էդ Շիրանը և Ջորջ Էզրան հավակնում են չորս պարգևների: Բոլոր երեք երաժիշտներն էլ ներկայացված են երկու գլխավոր անվանակարգերում՝ «լավագույն բրիտանացի կատարող» և «լավագույն բրիտանական ալբոմ»:

Երաժիշտներ Բեքը, Հոզիերը, Ջեք Ուայթը, Ջոն Լեջենդը և Ֆարել Ուիլյամսն այս տարի հավակնում են «լավագույն միջազգային կատարողներ» կոչմանը:

«Լավագույն բրիտանական կատարողուհի» կոչման համար այս անգամ կպայքարեն Էլլա Հենդերսոնը, Թալիա Բառնետը, որն ավելի հայտնի է որպես FKA Twigs, Ջեսի Ուերը, Լիլի Ալենը և Փալոմա Ֆեյթը: Միևնույն ժամանակ «ավագույն միջազգային կին կատարողը» կարող են դառնալ Բեյոնսեն, Լանա Դել Ռեյը, Սիան, Էննի Քլարքը, որը հանդես է գալիս St Vincent կամ Թեյլոր Սվիֆթ կեղծանվամբ:

ՏԱՍՍ-ը նշում է, որ «Լավագույն բրիտանական խումբ» կատեգորիայում ներկայացված են alt-J-ն, Clean Bandit-ը, Coldplay-ը, Royal Blood-ը և One Direction-ը: «Լավագույն միջազգային խումբ» անվանակարգում նշված են հինգ արտասահմանյան կոլեկտիվներ, որոնց թվում են՝ 5 Seconds of Summer-ը, The Black Keys-ը, First Aid Kit-ը, Foo Fighters-ը և The War on Drugs-ը:

BRIT Awards-ը 1977 թվականին հիմնել է Մեծ Բրիտանիայի ձայնագրության ինդուստրիայի ասոցիացիան: Այս մրցանակը, որն ամեն տարի հանձնվում է հիմնականում բրիտանացի փոպ-կատարողներին, համարվում է ամերիկյան Grammy Awards-ի նմանօրինակը: