Google-ը դադարեցնում է Google Glass ակնոցի արտադրությունը

Google ընկերությունը հայտարարել է Google Glass փորձարարական տեխնոլոգիայի՝ թափանցիկ դիսփլեյով և խցիկով հանդերձված ակնոցի արտադրությունը դադարեցնելու մասին: Այս որոշման պատճառ են դարձել գնի, ինչպես նաև օգտատերերի անձնական տվյալների պաշտպանության հարցերը, տեղեկացնում է «Արմենպրես»-ը՝ հղում անելով BBC-ին:

Google Glass-ի բետա-տարբերակն ԱՄՆ-ի խանութների վաճառասեղաններին է հայտնվել մայիսին, դրա արժեքը կազմել է մեկուկես հազար դոլար:

Առաջին անգամ Google Glass սարքը, որն ակնոցի ապակիներին պատկերում է Համացանցի բովանդակությունը, ներկայացվել է 2012 թվականին ընկերության շնորհանդեսի ժամանակ:

Սարքը կարելի է օգտագործել լուսանկարման և տեսանկարահանման, ինչպես նաև էլեկտրոնային փոստի և սոցիալական ցանցերի միջոցով՝ նկարահանված նյութի առաքման համար: Սարքը կառավարելիս օգտագործվում են ձայնային հրամաններ:

Ամբողջ տեղեկատվությունը հայտնվում է ակնոցի մեջ ներսարված ոչ մեծ թափանցիկ էկրանին:

Ընկերությունում նշում են, որ խոսքը վերաբերում է նախագծի սոսկ ժամանակավոր դադարեցմանը, սակայն կատարելագործված տարբերակի թողարկման ժամկետը որոշված չէ: