ՀՀ փոխոստիկանապետը Գյումրու վիճակը հանգիստ ու նորմալ է գնահատում

Գյումրիում իրավիճակը նորմալ է ու հանգիստ: Այս մասին «Արմենպրես»-ի հետ զրույցում հայտարարեց ՀՀ ոստիկանության պետի տեղակալ, ոստիկանության գնդապետ Սամվել Հովհաննիսյանը: «Այս պահին Գյումրիում որևիցե խնդիր չկա»,-ավելացրեց Սամվել Հովհաննիսյանը՝ Գյումրիում լրացուցիչ ոստիկանական խմբերի ա ռկայությունը նորմալ համարելով: «Ցանկացած միջոցառման ժամանակ լրացուցիչ խմբեր գալիս են. ես այստեղ չեմ տեսնում արտառոց որևէ բան»,-ավելացրեց Սամվել Հովհաննիսյանը:

Գյումրիում տեղակայված ՌԴ հյուպատոսարանի մոտ հունվարի 15-ին տեղի ունեցած միջադեպի հետևանքով Գյումրիում բերման է ենթարկվել 21 քաղաքացի, որոնցից մի քանիսի նկատմամբ կազմվել են վարչական իրավախախտումների արձանագրություններ և նրանք սահմանված ժամկետում ազատ են արձակվել: Սամվել Հովհաննիսյանը վստահեցրեց, որ այս տեղեկությունն է հավաստի և ոչ այն, ինչ որոշ մարդկանց կողմից շահարկվում է:

Հունվարի 16-ի ժամը 14:00-ի դրությամբ՝ բուժհաստատություններ են դիմել 28 տուժածներ, որոնցից 18-ը՝ ոստիկանության ծառայողներ:

Գյումրիում հունվարի 15-ին Ավետիսյանների ընտանիքի հուղարկավորությունից հետո իրավիճակը Գյումրիում լարվել է: Հանրահավաքի մասնակիցները Շիրակի մարզի դատախազության շենքի առջև հանդիպել են ՀՀ գլխավոր դատախազ Գևորգ Կոստանյանին, ով վստահեցրել է, որ դիմելու է ռուսական կողմին՝ ոճրագործին հայաստանյան իրավապահներին հանձնելու համար: Այնուհետև հանրահավաքի մասնակիցները պահանջել են նկարահանել ոճրագործին, որպեսզի հավաստիանան, որ նա գտնվում է Գյումրիում: Դատախազության շենքի մոտից հանրահավաքի մասնակիցներն ուղևորվել են ՌԴ հյուպատոսարանի շենք, որտեղ էլ ցուցարարների և ոստիկանների միջև արձանագրվել է բախում: Երեկոյան չնախատեսված հավաք է տեղի ունեցել նաև Երևանի Ազատության հրապարակում:

Արմենուհի Մխոյան