Էդուարդ Շարմազանովը միասնական լինելու ու աղոթելու կոչ է անում

Ազգային ժողովի փոխնախագահ Էդուարդ Շարմազանովը միասնական լինելու ու աղոթելու կոչ է անում: Հունվարի 21-ին Գյումրիում Ավետիսյանների ընտանիքի կրտսեր անդամի' փոքրիկ Սերյոժայի հուղարկավորությանը մասնակցում էին նաև ԱԺ փոխնախագահները: Էդուարդ Շարմազանովը, դժվարությամբ զսպելով հուզմունքը, լրագրողների հետ ունեցած ճեպազրույցի ժամանակ աղոթելու կոչ արեց: «Որպես քրիստանյա մարդ' պետք է աղոթենք առ Աստված մեր եղբայրների, քույրերի ու բալիկների հավերժության համար: Պետք է աղոթենք: Ցավն ամոքելու բանաձև չեմ գտնում: Այս դժբախտությանը ի՞նչ բանաձև: Լինենք միասնական և մենք մեր մեջ թշնամիներ չգտնենք: Սա բոլորիս ցավն է, լինենք միասնական և աղոթենք առ Աստված»,- նշեց Էդուարդ Շարմազանովը:

Գյումրիում տեղի ունեցած դեպքի առթիվ իրենց ցավակցական խոսքն ու վերքը բուժելու իրենց բանաձևն «Արմենպրես»-ին ներկայացրեցին Ավետիսյանների ընտանիքի կրտսեր անդամի՝ փոքրիկ Սերյոժա Ավետիսյանի հուղարկավորությանը Գյումրիում գտնվող ԱԺ պատգամավորները: «Բոլոր ցավերը ժամանակն է հաղթահարում: Մենք, չմոռանանք, որ ցեղասպանություն ենք հաղթահարել: Այս դեպքը ցեղասպանության շատ փոքր տեսակն էր: Իրոք, ողբերգություն էր և չեմ կարծում, որ ամեն մի հայ չի ողբում այսօր: Ոճրագործին պետք է պատժել. օրենքի ամենախիստ պատիժը պետք է լինի»,- նշեց Աշոտ Աղաբաբյանը:

Ոճրագործին ամենախիստ պատժին ենթարկելու կոչ հնչեց նաև Արման Սահակյանի կողմից: «Պետք է պատիժը շատ հասկանալի լինի ու պատժվեն ոչ միայն ոճրագործը, այլ նաև սպաները, բացի դրանից, դատն էլ պետք է լինի Հայաստանում: Սա, ճիշտ է, սփոփանք չէ, բայց ժողովուրդն էլ պետք է հասկանա, որ սրիկան պատժվել է՝ ուրիշ տարբերակ չկա»,- նշեց Արման Սահակյանը:

«Քրեական գործով պետք է պարզվեն բոլոր հանգամանքները և նախաքննությունը պետք է վարեն Հայատանի իրավապահ մարմինները: Երբ հանցագործություն է տեղի ունենում, անշուշտ, հուզումներն ու ապրումները հասկանալի են, բայց լուծումն այն է, որ հանցագործությունը լիարժեք պարզաբանվի. այս պահին ես այդ հարցն եմ տեսնում»,- «Արմենպրես»-ին ասաց Նիկոլ Փաշինյանը:

Ավետիսյանների ընտանիքի 6 անդամի սպանությունը տեղի է ունեցել 2015 թվականի հունվարի 12 ին՝ վաղ առավոտյան, ժամը 06:00-ի սահմաններում, նրանց մահը վրա է հասել հրազենից արձակված կրակոցների հետևանքով: Ընտանիքից ողջ էր մնացել 6 ամսական փոքրիկը՝ Սերյոժա Արմենի Ավետիսյանը, ով կտրող-ծակող գործիքից ստացած վնասվածքներով տեղափոխվել էր բժշկական կենտրոն, որտեղ հունվարի 19-ին մահացել է:

Հանցագործության մեջ մեղադրվող ռուս զինծառայող Վալերի Պերմյակովին ռուս սահմանապահները հայտնաբերել են հայ-թուրքական սահմանը հատելիս և հանձնել 102-րդ ռուսական բազայի հրամանատարությանը: Պերմյակովը խոստովանել է հանցանքը:

Արմենուհի Մխոյան