Վրաստանում և Ուկրաինայում կատարվել է հոգեհանգստյան արարողություն ի հիշատակ Ավետիսյանների ընտանիքի

Թբիլիսիի Սուրբ Էջմիածին եկեղեցում կատարվել է հոգեհանգստյան արարողություն և մոմավառություն՝ ի հիշատակ հունվարի 19-ին մահացած 6-ամսական Սերյոժա Ավետիսյանի և հունվարի 12-ին Գյումրիում դաժանաբար սպանված Ավետիսյանների ընտանիքի մյուս անդամների:

Ինչպես «Արմենպրես»-ին փոխանցեցին Վիրահայոց թեմի մամլո դիվանից, եկեղեցու սպասավոր Տեր Մանուկ քահանա Զեյնալյանը, հոգեհանգստյան պաշտոնից հետո դիմել է հավաքված ժողովրդին և կոչ արել մխիթարվել Ավետիսյան ընտանիքի անդամների հիշատակով և վիշտը հաղթահարել աղոթքով:

Գյումրիում դաժանաբար սպանված Ավետիսյան ընտանիքի անդամների հիշատակին հոգեհանգստյան պաշտոն և մոմավառություն է կատարվել նաև Սամցխե-Ջավախքի և Քվեմո Քարթլիի եկեղեցիներում, Բաթումում ՀՀ հյուպատոսության շենքի մոտ կատարվել է մոմավառություն:

«Analitika»-ի փոխանցմամբ, Ուկրաինայում Հայաստանի դեսպանատան դիմաց ուկրաինահայերը ծաղիկներ են դրել և մոմավառություն կազմակերպել ի հիշատակ Ավետիսյանների: Միջոցառմանը ելույթ են ունեցել Ուկրաինայում Հայաստանի դեսպան Անդրանիկ Մանուկյանն ու Ուկրաինայի հայերի երիտասարդական միության նախագահ Վարդան Հարությունյանը:

ՀՀ և ՌԴ քննչական կոմիտեների նախագահներն աշխատանքային քննարկումների արդյունքում համաձայնություն են ձեռք բերել՝ Գյումրիում Ավետիսյանների ընտանիքի 7 անդամների սպանության գործի քննության շրջանակում իրականացնել համատեղ և փոխհամագործակցված գործողություններ' քրեական գործի քննության համակողմանիությունը և լիարժեք բացահայտումն ապահովելու ուղղությամբ: Աշխատանքներն առավել արդյունավետ կազմակերպելու նպատակով համաձայնություն է ձեռք բերվել ստեղծել համակարգող մարմին:

Հունվարի 21-ին ՀՀ քննչական կոմիտեի քննիչները ռուսական 102-րդ ռազմաբազայում հարցաքննել են Վալերի Պերմյակովին: Դասալիք զինվորի դեմ քրեական գործ է հարուցվել ՀՀ քրեական օրենսգրքի 104-րդ հոդվածի 2-րդ մասի 1-ին կետով (երկու և ավելի անձանց սպանություն): Վալերի Պերմյակովն ընդունել է իրեն առաջադրված մեղադրանքը: