«ՀՀ-ում ահազանգման համակարգը վերափոխվելու է». Հովհաննես Խանգելդյան

Հայաստանում ահազանգման համակարգը վերափոխվելու է: Լրագրողների հետ հունվարի 22-ին կայացած հանդիպմանը հայտարարեց ՀՀ տարածքային կառավարման և արտակարգ իրավիճակների նախարարության ճգնաժամային կառավարման կենտրոնի պետ, փրկարար ծառայության գնդապետ Հովհաննես Խանգելդյանը: «ՀՀ նախագահ Սերժ Սարգսյանի հանձնարարականով պետք է ստեղծվի ահազանգման միասնական համակարգ, որը հնարավորություն կտա զանգահարելով 911 ծառայություն և տեղյակ պահելով արտակարգ դեպքի մասին, այլևս լրացուցիչ կարիք չլինի առան ձին-առանձին զանգահարել 1-01, 1-02, 1-03 ծառայություններին»,-«Արմենպրես»-ի հաղորդմամբ` ասաց նա և հավելեց, որ մարզերում ստեղծվելու է 1-03 ծառայության տեղայնացված համակարգ, որի շնորհիվ մարզերի բնակիչները զանգահարելու են ոչ թե Երևանի կայան, այլ իրենց շրջկենտրոնի կայան: Նա հայտնեց նաև, որ 911 ծառայությունը նախորդ տարի սպասարկել է 1 միլիոն 460 հազար զանգ, ինչը 90 հազարով ավելի է 2013 թվականի համեմատ:

Հովհաննես Խանգելդյանը նշեց նաև, որ 2014 թվականին գրանցված արտակարգ դեպքերը ավելացել են 985-ով` 2013թվականի համեմատ, բայց զոհերի քանակը նվազել է 24-ով: «Արտակարգ իրավիճակների մեծ մասը բաժին է ընկնում հիմնականում հրդեհներին, ճանապարհատրանսպորտային պատահարներին, թունավորումներին»,-ընդգծեց Խանգելդյանը և հավելեց, որ 2015 թվականի առաջին օրերին գրանցվել է 300-ից ավելի տրանսպորտային միջոցների արգելափակման դեպք, որոնցից 60-ը` Բավրայի սահմանային անցակետում: