Տավուշի մարզի սահմանամերձ գյուղերում իրավիճակն այս պահին հանգիստ է

Տավուշի մարզի սահմանամերձ գյուղերում իրավիճակը համեմատաբար հանգիստ է: Գիշերվա ընթացքում հակառակորդը կրակել է, սակայն հիմնականում սահմանին տեղակայված հայկական դիրքերի ուղղությամբ:

«Արմենպրես»-ի հետ զրույցում սահմանամերձ Բարեկամավան համայնքի ղեկավար Գագիկ Աբաջյանն ասաց, որ գիշերը կրակոցներ է լսել, սակայն դրանք ուղղված էին դեպի հայկական դիրքերը: «Վերջին անգամ գյուղի ուղղությամբ կրակել են հունվարի 17-ի լույս 18-ի գիշերը: Շատ ուժեղ կրակոցներ էին, նախկինում էդպես չէին կրակել: Մի քանի օր է՝ գյուղում իրավիճակը հանգիստ է, բայց դիրքերի ուղղությամբ կրակում են»,- ասաց Աբաջյանը:

Չինարի համայնքի ղեկավար Սամվել Սաղոյանը ևս նշեց, որ գիշերը գյուղի ուղղությամբ կրակոցներ չեն եղել, իսկ դիրքերի ուղղությամբ եղել են: Սաղոյանի հավաստիացմամբ, թե՛ դիրքերի, թե՛ գյուղի վրա կրակոցների արձակումն արդեն սովորական է դարձել չինարեցու համար:

Վազաշեն համայնքի ղեկավար Լորիկ Բադիրյանն էլ փաստեց, որ այս պահին գյուղում իրավիճակը հանգիստ է, իսկ Վազաշեն-Պառավաքար ավոտճանապարհը բնականոն կերպով աշխատում է:

«Արմենպրես»-ի հետ զրույցում ՀՀ ՊՆ մամուլի խոսնակ Արծրուն Հովհաննիսյանը հաստատեց, որ հայ-ադրբեջանական սահմանում իրավիճակը հանգիստ է, գիշերվա կրակոցներից և դիվերսիայի անհաջող փորձից հետո թշնամին լռել է:

Հունվարի 1-ից ադրբեջանական կողմը ղարաբաղա-ադրբեջանական սահմանին կրակում է զենքի տարբեր տեսակներով, այդ թվում՝ նռնականետներով և ականանետներով, ինչի արդյունքում հայկական կողմը կրել է 9 զոհ: Հունվարի 22-ին Տավուշի մարզի ուղղությամբ հակառակորդը հերթական դիվերսիոն հարձակումն է իրականացրել, որը հայկական զինված ուժերը կարողացել են կանխել: Մեկ գիշերվա մեջ Տավուշի մարզում տեղակայված հայկական դիրքերի ուղղությամբ հակառակորդը ավելի քան 200 կրակոց է արձակել: