Միհրան Պողոսյանը խոսել է ԴԱՀԿ աշխատակիցների՝ Ծիծեռնակաբերդում երդվելու մասին

ՀՀ գլխավոր հարկադիր կատարող Միհրան Պողոսյանը պարզաբանել է, թե ինչու են ԴԱՀԿ նոր աշխատակիցները երդում տվել Ծիծեռնակաբերդում: Հունվարի 23-ին կայացած ասուլիսի ընթացքում Միհրան Պողոսյանը, անդրադառնալով լրագրողներից մեկի այն հարցին, թե ո՞վ է կայացրել այդ որոշումը, նշեց, որ իրենց խնդիրն է յուրաքանչյուր նոր աշխատակցի մեջ ներդնել հայրենասեր լինելու գաղափարը, որն անհրաժեշտ է յուրաքանչյուր պետական պաշտոնյայի համար: «Երդումը Ծիծեռնակաբերդում անցկացնելը եղել է իմ որոշումը: Ես գտնում եմ, որ դա նպաստում էր, եթե չլինեին այդքան վատ արձագանքներ, էլ ավելի կնպաստեր մեր նոր աշխատակիցների մեջ հայերանասիրական մղումների ամրապնդմանը»,- «Արմենպրես»-ի հաղորդմամբ՝ նշեց Պողոսյանը:

Նա ընդգծեց, որ տարիքով ավելի մեծերը կհիշեն, որ իրենք ժամանակին պիոներ էին ընդունվում Լենինի արձանի կամ Լենինի դամբարանի մոտ: «Դա մեզ համար մեծ պատիվ էր: Մենք ժամանակին պարծենում էինք՝ գիտես, ես գնացի Լենինի արձանի տակ պիոներ ընդունվեցի: Ես կարծում եմ, որ այս ամենից պետք էր մեծ խնդիր սարքել: Այդ որոշումը եղել է միայն իմ որոշումը, և ես գտնում եմ, որ ճիշտ որոշում եմ կայացրել»,- նշեց նա:

Լրագրողներից մեկի դիտարկմանը, թե հնարավո՞ր է, որ այս տարի էլ ԴԱՀԿ նոր աշխատակիցներն իրենց երդումը տան Ծիծեռնակաբերդում, Միհրան Պողոսյանն ընդգծեց, որ այդ ուղղությամբ դեռ կմտածեն: