Միհրան Պողոսյանը ներկայացրեց ԴԱՀԿ-ի այս տարվա ծրագրերը

ՀՀ արդարադատության նախարարության Դատական ակտերի հարկադիր կատարման ծառայությունն այս տարի կանդամակցի Դատական կատարողների միջազգային կազմակերպությանը: Այս մասին հունվարի 23-ին լրագրողների հետ հանդիպմանը նշեց ՀՀ գլխավոր հարկադիր կատարող Միհրան Պողոսյանը՝ ներկայացնելով ծառայության 2015թ. ծրագրերը:

Նա տեղեկացրեց նաև, որ այս տարի ԴԱՀԿ-ն բոլոր մարզերում կունենա արագ սպասարկման գրասենյակներ: «Այս ծրագիրը մենք անցած տարի փորձարկեցինք Երևանում, և այն տվեց իր դրական արդյունքը: Մենք արդեն 4 մարզերում ունենք արագ սպասարկման գրասենյակներ: Գործընթացը շարունակվելու է այս տարվա ընթացքում, և մենք գրասենյակներ կունենանք բոլոր մարզերում»,- «Արմենպրես»-ի հաղորդմամբ՝ մանրամասնեց նա:

Անդրադառնալով համակարգում տեղեկատվական տեխնոլոգիաների ներդրման գործընթացին՝ Միհրան Պողոսյանն ընդգծեց, որ իրենք այս տարի կներդնեն նոր համակարգ, որով բոլոր այն պարտապանները, ովքեր վճարման խնդիր ունեն, չեն այցելի ծառայություն, այլ իրենց վճարումները կկատարեն տերմինալների միջոցով: «Սա մեր քաղաքացուն հեռու կպահի ավելորդ քաշքշուքներից, ինչը մեր հիմնական խնդիրներին է դասվում»,- պարզաբանեց Պողոսյանը:

Նա տեղեկացրեց, որ այս տարի հնարավորություն քաղաքացիների համար կստեղծվի կարգապահական վարույթների նյութերն առցանց դիտելու հնարավորություն: «Այսինքն' եթե այսօր պարտապանը կամ պահանջատերը գրություն է գրում և ծանոթանում իր նյութերին, ապա 2015թ. մենք ակնկալում ենք, որ հնարավորություն կունենանք կայքի միջոցով տրամադրել այդ տեղեկատվությունը պարտապանին և պահանջատիրոջը, որով նրանք կազատվեն այդ հարցով դիմում գրելու և ծառայություն այցելելու պարտավորությունից»,- նշեց նա:

Հաջորդ նորամուծությունը, որը 2015թ. կներդրվի ԴԱՀԿ ծառայությունում, պլանշետների միջոցով համակարգի հետ աշխատանքի ապահովումն է, այդ թվում նաև պարտապանի տնտեսությունում գույքագրման աշխատանքների ապահովումը: «Այսինքն' մեր ծառայությունում կմտնի աշխատանքի նոր մեթոդ. Աշխատակիցներին կբաժանվեն պլանշետներ, որոնց միջոցով գույքագրումն անմիջապես կարտացոլվի ծառայությունում»,- հայտնեց ՀՀ գլխավոր հարկադիր կատարողը: