«Լեվիաֆան»-ը հաղթել է «Ոսկե արծիվ»-ի չորս անվանակարգում

Մեծ աղմուկ հանած «Լեվիաֆան» ֆիլմը, որ ռուս հասարակությանը բաժանել էր երկու մասի, հերթական հաջողությունն է գրանցել: «Ոսկե Գլոբուս»-ում և Կաննի փառատոնում ունեցած հաջողություններից հետո ֆիլմը գնահատանքի է արժանացել արդեն հայրենիքում: Մոսկվայում ավարտված «Ոսկե արծիվ» մրցանակաբաշխության ժամանակ Ֆիլմը հաղթել է 4 անվանակարգում: Ինչպես հաղորդում է «Արմենպրես»-ը՝ վկայակոչելով «ՏԱՍՍ»-ը, «Լեվիաֆան»-ի ռեժիսոր Անդրեյ Զվագնիցևը ճանաչվել է 2014թ. լավագույն ռեժիսոր, ֆիլմի դերասանական կազմը նույնպես հեռացել է միջոցառումից պատվավոր արձանիկներով: Ռոման Մադյանովը ճանաչվել է լավագուն տղամարդ դերասան, Ելենա Լյադովան՝ լավագույն կին դերասան: Լավագույնն է ճանաչվել նաև ֆիլմի մոնտաժը:

Զվագնիցևը կարծիք է հայտնել, որ այս մրցանակը կազդի «Լեվիաֆան»-ի շուրջ հասարակական կարծիքի վրա: «Սա կինեմատոգրաֆի ոլորտում առկա բազմաթիվ մասնագետների գնահատականն է: Սա մասնագիտական կարծիք է, ինչը շատ կարևոր է»,- ասել է Զվագնիցևը՝ հավելելով, որ չի տխրել այն փաստից, որ գլխավոր մրցանակին՝ «Լավագույն ֆիլմ» անվանակարգում հաղթել է ոչ թե իր, այլ Նիկիտա Միխալկովի «Արևահարություն» ստեղծագործությունը:

«Տխրության որևէ պատճառ չկա, կա հոգնածություն: Եթե ես ասեմ, թե որ մրցանակն է ավելի կարևոր «Ոսկե Գլոբուս»-ը, որին ռուսական ֆիլմը 46 տարվա ընդմիջումից հետո երկրորդ անգամ է արժանանում: Կա մրցանակ լավագույն սցենար Կաննի կինոփառատոնում: Սրանք կարևոր մրցանակներ են: Ես չեմ մտածում մրցանակների կարևորության մասին: Կա գնահատանք: Իսկ թե որ մրցանակն է կարևոր, որն է գլխավորը, դա արդեն էական չէ»,- ասել է ռեժիսորը:

Ռուս ռեժիսոր Անդրեյ Զվագնիցևի «Լեվիաֆան» ֆիլմը մեծ աղմուկ է բարձրացրել: 46 տարվա ընդմիջումից հետո ռուսական ֆիլմը արժանացել է «Ոսկե Գլոբուս» մրցանակի: Ֆիլմն առաջադրված է նաև «Օսկար»-ի: Սակայն, հայրենիքում ֆիլմը միանշանակ չի ընդունվել: Ռուս հասարակությունը բաժանվել է երկու խմբի: Մի մասը քննադատում է Զվագնիցևին՝ անվանելով նրան դավաճան, մյուս մասն էլ շեշտում է, որ ռեժիսորն իր ֆիլմում ներկայացրել է ռուս հասարակությունը, իրական բարքերն ու կառավարության գործունեությունը: Զվագնիցևը հարցազրույցներից մեկում շեշտել է, որ ի ր ֆիլմերով ցանկանում է ներկայացնել իրական Ռուսաստանը, այն կյանքը, որ կա երկրի ծայրամասում, հեռավոր քաղաքներում:

«Դոժդ» հեռուստաընկերությանն էլ նա հայտնել է, որ «Ոսկե Գլոբուս»-ի արժանանալուց հետո քաղաքական որևէ բարձրաստիճան պաշտոնյա նրան չի շնորհավորել: