Մանվել Գրիգորյանը՝ Հայոց բանակի, Գյումրիի ոճրագործության և այլն մասին. Shamshyan.com

Հայաստան 26 Հունվար, 2015 16:30

Սահմանին կանգնած տղաներն իրենցն անում են, բայց մենք էլ իրականությունից կտրվելու իրավունք չունենք։ Այս մասին SHAMSHYAN.com-ի թղթակցի հետ զրույցում ասաց ԵԿՄ վարչության նախագահ, Արցախի հերոս, Զորավար, ԱԺ պատգամավոր Մանվել Գրիգորյանը՝ անդրադառնալով Հայոց բանակի օրվան, Գյումրիի ոճրագործությանը և այլ հարցերին: Նրա հետ հարցազրույցը ներկայացնում ենք ստորև.

- Պարո՛ն գեներալ, հունվարի 28-ին նշելու ենք Հայոց բանակի օրը: Հայաստանում այդ օրն ըստ պատշաճի՞ են նշում, թե՞ ոչ։

- Սա համազգային տոն է, օրվա կապակցությամբ հարկավոր է շնորհավորել աշխարհասփյուռ հայությանը՝ Հայաստանի, Արցախի, Սփյուռքի ողջ հայությանը։ Մենք երբեք չպետք է մոռանանք, որ բանակի կայացումը հենց Հայաստանի Հանրապետության կայացումն է։ Հայոց բանակը ստեղծվեց ծանրագույն պայմաններում, երբ մեր երկիրն ուներ բազում անլուծելի թվացող պրոբլեմներ։ 1988-ի դեկտեմբերի 7-ի երկրաշարժի հետևանքով Հայաստանում կային հազարավոր անօթևան ընտանիքներ, դրան գումարվել էին այն ընտանիքները, որ մազապուրծ փրկվել էին Սումգայիթի, Բաքվի ցեղասպանությունից։ Ի հավելումն այդ ամենի՝ արցախցու արդար, ժողովրդավարական պահանջին թուրքական Ադրբեջանը պատերազմ հակադրեց։ Պատերազմում էինք՝ ունենալով այսքան խնդիրներ և գտնվելով Ադրբեջանի ու Թուրքիայի կողմից լիակատար շրջափակման մեջ։ Պատերազմն իրենց վրա վերցրին երկրապահ կամավորական ջոկատները, որոնց միավորման և համակարգված աշխատանքի համար պարտական ենք Սպարապետ Վազգեն Սարգսյանին։ Սպարապետը դարձավ և՛ Երկրապահի հիմնադիրը, և՛ ՀՀ առաջին պաշտպանության նախարարն ու բանակի հիմնադիրը։ Հայոց բանակը ստեղծվել է հազարավոր մեր ընկերների արյան գնով, հազարավոր վիրավոր և հաշմանդամ դարձածների քրտինքով, մեր սուրբ մայրերի դառը արցունքներով, բայց կայացել է, դարձել ՀՀ և Արցախի հայկական հանրապետությունների անվտանգության երաշխավորը։ Այնպես որ, ազգային այս մեծ տոնի կապակցությամբ ես ջերմորեն շնորհավորում եմ մեր երկրապահ ժողովրդին, շնորհավորում եմ սահմանապահ հայ զինվորին՝ շարքայինից մինչև պաշտպանության նախարար և զինված ուժերի գերագույն գլխավոր հրամանատար։ Շնորհավորում եմ սահմանամերձ բնակավայրերի բնակչությանը, որ հենց սահմանին բնակվելու, արարելու փաստով երկրապահ են, սահմանապահ են, մեր Սպարապետին և Արցախյան ազատամարտի մնացյալ նահատակներին եմ շնորհավորում, շնորհավորում եմ հերոսներ ծնած մեր հերոս մայրերին։ Առանձնահատուկ շնորհավորանքներս Սպարապետ ծնած Գրետա մայրիկին՝ մեր մեծ մայրիկին։ Շնորհավորելով՝ ընդգծեմ, որ բանակը մեր պետության մեջ ամենակայացած կառույցներից է։ Բանակը հիմնադրեց Սպարապետ Վազգեն Սարգսյանը, հետագայում կառույցը կայացավ հաջորդ նախարարների ջանքերով՝ Վազգեն Մանուկյանի, Սերժ Սարգսյանի։ Հենց Սերժ Սարգսյանի նախարարության ժամանակ մենք կարողացանք հաղթական հրադադար պարտադրել մեզ պատերազմ պարտադրած արյունարբու թուրքին։

- Իսկ ի՞նչ վիճակում է այսօր հայկական բանակը։

- Այսօրվա նախարար Սեյրան Օհանյանը ևս Վազգեն Սպարապետի հիմնած լավագույն ավանդույթների շարունակողն է։ Մեր բանակն այսօր ևս կարողանում է ապացուցել, որ մարտունակ է, որ տարածաշրջանում առաջատար է, որ ընդունակ է իր առջև լուրջ առաջադրանքներ դնել և հաջողությամբ լուծել, հարկ եղած դեպքում կիրառել 21-րդ դարի առաջատար բանակներին բնորոշ օպերացիաներ։ Բայց ես կամենում եմ, որ ամեն մի հայ ընկալի, ըմբռնի, որ բոլորս ենք բանակը։ Սահմանն ամենքինս է։ Մեր ամբողջ ժողովուրդն է սահմանապահ։ Ամեն մի ակնթարթում մենք պետք է կարողանանք մեզ դնել սահմանին կանգնած հայ զինվորի վիճակում։ Ամեն ոք պետք է անընդհատ մտածի, որ ոչ թե իր արարքներով թշնամու բերանը լեզու դնի, այլ թշնամու լեզուն բերանից պոկի, հանի։ Բոլորս պետք է ապրենք «նախ և առաջ՝ սահմանի համար, նախ և առաջ՝ սահմանին կանգնած զինվորի համար» նշանաբանով։ Կամք և միասնություն է հարկավոր մեր ժողովրդին։ Հասկացեք՝ մենք պատերազմի մեջ ենք։ Ի դեպ, միշտ է այդպես եղել։ 1989-ից մինչ օրս անձամբ եմ տեսել և մաշկիս վրա զգացել։ Մենք ապրում ենք պատերազմական իրավիճակում՝ ամեն օր կրակոցներ են սահմանին, շարունակ զոհեր ենք տալիս, վիրավորվում են հայ քաջեր, տղաներ, որ կարողանում են հերոսաբար չեզոքացնել ոսոխի դիվերսիոն թափանցման ցանկացած փորձ։ Տղաներն իրենցն անում են, բայց մենք էլ իրականությունից կտրվելու իրավունք չունենք։

Շարունակությունն՝ այստեղ