Էդվարդ Նալբանդյանն արձագանքել է հայ ժողովրդին ուղղված Դավութօղլուի ուղերձին

Թուրքիայի իշխանությունները 8 տարի շարունակ չկարողացան կամ չցանկացան բացահայտել Հրանտ Դինքի սպանության մեղավորներին, իսկ հիմա խոսում են հարգանքի մասին: Հունվարի 26-ին լրագրողների հետ հանդիպմանը նման կարծիք հայտնեց ՀՀ ԱԳ նախարար Էդվարդ Նալբանդյանը՝ պատասխանելով Հրանտ Դինքի մահվան 8-րդ տարելիցի կապակցությամբ Թուրքիայի վարչապետ Ահմեդ Դավութօղլուի ուղերձին: «Նախ հարց է առաջանում, թե ինչու Դավութօղուն կամ բարձաստիճան այլ պաշտոնյաներ սպասում էին, որպեսզի 2015թ. նոր հայտարարություն անեն Դինքի սպանության վերաբերյալ: Ինչո՞ւ յոթերորդ, վեցերորդ, հինգերորդ, չորրորդ, երրորդ տարելիցների կապակցությամբ այդ ահավոր սպանության վերաբերյալ որևէ հայտարարություն չեղավ: Ինչպե՞ս կարելի է դա բացատրել: Եվ հետո 8 տարի շարունակ Թուրքիայի իշխանությունները չկարողացան կամ չցանկացան բացահայտել Դինքի սպանության մեղավորներին, իսկ հիմա խոսում են ինչ-որ հարգալից վերաբերմունքի մասին»,- «Արմենպրես»-ի հաղորդմամբ՝ նշեց նախարարը:

Նալբանդյանն ընդգծեց, որ միևնույն ժամանակ, Թուրքիայի իշխանություններն իրենց աջակցությունն են հայտնում տխրահռչակ Փերինչեքին, ով հենց Դինքի սպանության կապակցությամբ ոչ միայն Հայոց ցեղասպանությունը ժխտող, այլ նաև ատելությամբ լի հայտարարություններ էր անում հայ ժողովրդի նկատմամբ: «Այս հայտարարության մեջ նոր որևէ բան չկա, դրանց պատասխանը տրվել է»,- շեշտեց նախարարը:

Էդվարդ Նալբանդյանը նաև ընդգծեց, որ թուրքական իշխանությունները վերջին 5-6 տարվա ընթացքում մեծ հնարավորություն ունեին օգտագործելու այն պատմական առիթը, որն առկա էր՝ վավերացնելով հենց Դավութօղլուի կողմից ստորագրված արձանագրությունները և կյանքի կոչելով երկու ժողովուրդների մերձեցման գործընթացը: «Ավաղ, չկարողանալով ձերբազատվել իրենց ներքին տաբուներից' թուրքական իշխանությունները շարունակեցին առիթը բաց չթողնել՝ ժխտել Հայոց ցեղասպանությունը և հայ ժողովրդի, Հայաստանի նկատմամբ ոչ բարեկամական հայտարարություններ և գործողություններ անել, ինչն ավելի խորացրեց անվստահությունը»,- ընդգծեց Նալբանդյանը:

Նախարարը հիշեց, որ ինքը մի առիթով Թուրքիայի ներկայիս վարչապետին խորհուրդ է տվել փիլիսոփայությունից անցնել հստակ և իրատեսական քայլերի: «Մի խոսքով՝ սայլը թոզ փչելով առաջ չես շարժի»,- եզրափակեց նա: