Մենք պարտադրելու բոլոր հնարավորություններն ունենք. Սեյրան Օհանյան (տեսանյութ)

Այսօր ՀՀ Պաշտպանության նախարարությունում տեղի ունեցավ Պաշտպանության նախարար Սեյրան Օհանյանի մամուլի ասուլիսը:

ՀՀ պաշտպանության նախարար Սեյրան Օհանյանի գնահատմամբ՝ հայկական զինված ուժերն իրավիճակի ճշգրիտ գնահատման նախաձեռնողականության և նոր մոտեցումների որդեգրման շնորհիվ կարողացել են ոչ միայն պաշտպանել երկրի սահմանները, այլև դառնալ բոլոր չափորոշիչներով 21-րդ դարին համապատասխանող բանակ:

Օհանյանի խոսքով՝ Ադրբեջանը շարունակում է գերռազմականացման քաղաքականությունը, իր հասարակությունում ատելություն սերմանելով հայերի նկատամամբ:

«Հակառակորդը մեկ տարվա ընթացքում և նաև այս տարի դիվերսիոն հետախուզական գործողություններ է իրականացրել, դիպուկահարների պատերազմ է իրականացնում, որոնք կրում են դիտավորյալ և պլանավորված բնույթ: Սակայն, ամենաթույլ հաջողության դեպքում, Ադրբեջանն ավելի լուրջ քայլեր կկատարեր: Նրանք լուրջ հաջողության չեն հասել, և նրանց զսպել է հայ զինվորը: Նախորդ տարի հակառակորդին հաղթեցինք բոլոր ճակատներում և մատնեցինք պարտության, ցավոք, ունենալով նաև զոհեր»,- ամփոփիչ ասուլիսի ժամանակ ասաց Սեյրան Օհանյանը:

Վերջինիս խոսքով՝ Ադրբեջանն աննախադեպ լարվածության մեջ է պահել ՀՀ-ԼՂՀ սահմանները՝ պարտադրելով, որպեսզի հայկական կողմը քաղաքական զիջումների գնա՝ տեսնելով, որ հաջողությունների չի հասնում՝ 2015-ը սկսել է ավելի հանդուգն ու լկտի մոտեցամբ:

«Այս անգամ ևս նրանք պարտվեցին: Հայ զինվորն իր տունն է պաշտպանում, նա ազնիվ է և հայրենասեր: Մենք չենք կորցրել, մենք գտել ենք մեր իրական հերոսներին: Մենք կա՛մ պետք է պահպանենք հրադարարի պայմանագիրը, կա՛մ համապատասխան միջոցներ ձեռնարկենք պարտադրելու խաղաղություն: Մենք պարտադրելու բոլոր հնարավորություններն ունենք»,- ասաց նա:

Տեսանյութը՝ Azatutyun.am-ի