Հայաստանի անդամակցությունը ԵՏՄ-ին լավ հնարավորություն է հայ-իրանական համագործակցության խորացման համար

Հայաստանի անդամակցությունը Եվրասիական տնտեսական միությանը լավ հնարավորություններ է ստեղծում Հայաստանի և Իրանի համագործակցության զարգացման և ընդլայնման համար: Հունվարի 27-ին Հայաստանի և Իրանի արտաքին գործերի նախարարների բանակցությունների ավարտից հետո լրագրողների հետ հանդիպմանը նման կարծիք հայտնեց Իրանի արտաքին գործերի նախարար Մոհամադ Ջավադ Զարիֆը: «Մենք հույս ունենք օգտվել այն հանգամանքից, որ Հայաստանը դարձել է Եվրասիական տնտեսական միության անդամ: Մենք ունենք նաև եռակողմ համագործակցություն Հայաստանի, Իրանի և Ռուսաստանի միջև, և սա ևս մեկ հնարավորություն է եռակողմ այդ համագործակցությունը խորացնելու համար: Մենք հարևան երկրներ ենք, ունենք մեր շահերը, իսկ Եվրասիական տնտեսական միությունը լավ հնարավորություն է այդ շահավետ համագործակցության համար»,- «Արմենպրես»-ի հաղորդմամբ՝ ընդգծեց Իրանի ԱԳ նախարարը:

ՀՀ ԱԳ նախարար Էդվարդ Նալբանդյանն էլ իր հերթին նշեց, որ Հայաստանը նոր է անդամակցել Եվրասիական տնտեսական միությանը և ուսումնասիրում է բոլոր հնարավորությունները, որպեսզի այդ անդամակցությունը դրական ձևով անդրադառնա ոչ միայն միության անդամ երկրների, այլ նաև մյուս գործընկեր երկրների հետ հարաբերությունների վրա: «Մենք ցանկանում ենք շարունակել խորացնել տնտեսական համագործակցությունը մեր հարևան երկրների հետ, որոնց թվում է նաև Իրանը»,- ընդգծեց Նալբանդյանը: