Առողջապահության նախարարությունն ու ԵԿՄ-ն փոխընմբռնման հուշագիր են ստորագրել

ՀՀ առողջապահության նախարարության և «Երկրապահ կամավորականների միություն» հասարակական կազմակերպության միջև ստորագրվել է փոխընմբռնման հուշագիր, որը միտված է երկրապահների բժշկական օգնությունն ու սպասարկումն առավել կանոնակարգված կազմակերպելուն: Ինչպես «Արմենպրես»-ին տեղեկացրին ՀՀ առողջապահության նախարարությունից, հուշագրի ստորագրման հանդիսավոր արարողության սկզիբն ազդարարվել է Երկրապահ կամավորականների միության օրհներգով և «Իզմիրլյան» բժշկական կենտրոնի հոգևոր տեսուչ Տաթև արքեպիսկոպոս Սարգսյան օրհնությամբ:

ՀՀ առոջապահության նախարար Արմեն Մուրադյանը, ողջունելով միջոցառման մասնակիցներին, շեշտել է, որ թե՛ ռազմադաշտում, թե՛ խաղաղ պայմաններում բուժաշխատողները մշտապես եղել են Հայոց ազգային բանակի, երկրապահ կամավորականների կողքին: «Անուրանալի է ձեր դերակատարումը մեր երկրի անկախության ձեռքբերման, բանակի կայացման, Արցախյան գոյամարտում, սահմանների պաշտպանության գործում: Որպես նախարար` իմ պարտքն եմ համարում նշել, որ այս հուշագրի ստորագրումով ոչ թե նոր էջ է բացում, այլ հաստատվում են ավանդաբար եղած մոտեցումներն ու հարաբերությունները»,- նշել է Արմեն Մուրադյանը:

ՀՀ առողջապահության նախարարությունը բժշկական կազմակերպություններին համալիր աջակցություն կցուցաբերի երկրապահ կամավորականններին և նրանց ընտանիքի անդամներին բուժօգնություն` ներառյալ դժվարամատչելի հետազոտություններ և սրտի վիրահատություններ իրականացնելու նպատակով բաց դռների օրեր կազմակերպելու համար։

Նախարարն անդրադարձել է նաև առողջ ապրելակերպի քարոզման, ծխախոտի դեմ պայքարին, համատեղ հանրային առողջապահական ծրագրերի իրականացման կարևորությանը` հիշեցնելով, որ առողջությունը բացարձակ արժեք է: «Կարևոր է առողջ մարմնում առողջ հոգի դաստիարակել»,- ընդգծել է Արմեն Մուրադյանը` շնորհավորելով բոլորին Հայոց բանակի կազմավորման 23-րդ տարեդարձի առթիվ: Նա առանձնահատուկ շնորհավորել է բոլոր այն բուժաշխատողներին, ովքեր փառապանծ բանակի կազմավորման տարիներին ազնվաբարո աշխատանք են կատարել:

Իր խոսքն ուղղելով եռասերունդ երկրապահներին` «Երկրապահ կամավորականների միության» վարչության նախագահ, Արցախի հերոս, գեներալ-լեյտենանտ Մանվել Գրիգորյանը նշել է, որ երկրի կայունացմանը ուղեկցել է նաև բժշկության զարգացումը: Նա հիշել է, թե ինչպես Հայաստանի և Արցախ բժիշկները պատերազմի ժամանակ 24 ժամ ոչ միայն բարձր մակարդակով կատարել են իրենց մասնագիտական պարտականությունները, այլ նաև եղել են հայ ժողովրդի լավագույն մարտիկները: Ազատամարտիկներին բժշկական օգնություն ցուցաբերելու գործում նա կարևորել է, մասնավորապես, «Սուրբ Գրիգոր Լ ուսավորիչ» բժշկական կենտրոնի դերն ու անձնակազմի երկարամյա աշխատանքը:

ՀՀ բանակի կազմավորման 23-րդ տարեդարձի կապակցությամբ ՀՀ ԵԿՄ վարչության նախագահի կողմից ՀՀ առողջապահության նախարար Արմեն Մուրադյանն արժանացել է «ԵԿՄ 20 տարի» հոբելյանական մեդալի: