Սկսվել է ՆԱՏՕ-ի գլխավոր քարտուղարի տեղակալի այցը Վրաստան

ՆԱՏՕ-ի գլխավոր քարտուղարի տեղակալ Ալեքսանդր Վերշբոուն հունվարի լույս 29-ի գիշերը երկօրյա այցով ժամանել է Վրաստան, որի հիմնական նպատակը Վրաստան-ՆԱՏՕ գործակցության փաթեթի իրագործման մոնիթորինգն է, տեղեկացնում է «Արմենպրես»-ը՝ հղում անելով «Նովոստի Գրուզիային»:

Այցի շրջանակներում Վերշբոուն հանդիպում կունենա Վրաստանի նախագահ Գեորգի Մարգվելաշվիլիի, վարչապետ Իրակլի Ղարիբաշվիլիի, խորհրդարանի խոսնակ Դավիթ Ուսուպաշվիլիի, եվրաինտեգրացման հարցերի պետնախարար Դավիթ Բաքրաձեի, ինչպես նաև հանրապետության կառավարության այլ անդամների հետ:

«Ես անհամբերությամբ եմ սպասում վրացի իմ գործընկերների հետ հանդիպումներին: Մենք կքննարկենք Վրաստանի և ՆԱՏՕ-ի համագործակցության հարցերը: Ես կհանդիպեմ նաև ընդդիմության ներկայացուցիչների և պատրիարքի հետ»,- ասել է Վերշբոուն լրագրողներին:

Ինչպես հաղորդել է վարչապետի մամուլի ծառայությունը, օրվա երկրորդ կեսին Ղարիբաշվիլին և Վերշբոուն համատեղ հայտարարություն կանեն մամուլի համար:

ՆԱՏՕ-ի գլխավոր քարտուղարի տեղակալը նաև կայցելի Վրաստան-ՆԱՏՕ համատեղ վարժական կենտրոնի կառուցման վայր, որը նախատեսված երկկողմ գործակցության փաթեթով, և հանդես կգա դասախոսությամբ:

Դաշինքին անդամակցելու Վրաստանի ձգտմանն աջակցող միջոցառումների փաթեթը հաստատվել է ՆԱՏՕ-ի՝ 2014 թվականի սեպտեմբերի 4-5-ը Ուելսում կայացած գագաթնաժողովի ընթացքում: Դրա շրջանակներում նախատեսվում է Վրաստանոմ բացել վարժական կենտրոն, որտեղ պատրաստություն կանցնեն դաշինքի և ՆԱՏՕ-ի գործընկեր երկրների զինծառայողները: