Facebook-ը տարվա ընթացքում զուտ շահույթի գրեթե կրկնակի աճ է արձանագրել

Facebook սոցիալական ցանցի զուտ շահույթը, 2014 թվականի 4-րդ եռամսյակի տվյալներով, կազմել է 701 մլն դոլար՝ 2013 թվականի ցուցանիշի համեմատությամբ աճելով 34 տոկոսով: Այդ մասին, ինչպես տեղեկացնում է «Արմենպրես»-ը, ասված է ընկերության նյութերում:

Դրա հետ մեկտեղ ամբողջ 2014 թվականի ընթացքում Facebook-ը զուտ շահույթն ավելացրել է գրեթե կրկնակի (93 տոկոսով)՝ մինչև 2,9 մլրդ դոլար:

Ընկերության հասույթը 4-րդ եռամսյակում 49 տոկոս աճ է արձանագրել և կազմել է 3,85 մլրդ դոլար: 2014 թվականի արդյունքներով՝ ընկերությունն ստացել է 12,47 մլրդ դոլարի հասույթ՝ այն մեկ տարի առաջվա համեմատությամբ ավելացնելով 58 տոկոսով:

Եռամսյակային հասույթի մեծ մասը բաժին է ընկնում գովազդից ստացված եկամուտներին: Այդ սեգմենտում հասույթը կազմել է 3,59 մլրդ դոլար: Ընդսմին ընկերությունը նշում է, որ գովազդային հասույթի 69 տոկոսը բաժին է ընկնում շարժական գովազդին:

Ինչպես նշում է ՏԱՍՍ-ը, 2014 թվականի արդյունքներով՝ Facebook-ի լսարանը 2013 թվականի համեմատությամբ աճել է 18 տոկոսով և հասել 890 մլն օգտատերերի, որոնցից 745 միլիոնը շարժական օգտատերերն են: Ինչ վերաբերում է շարժական օգտատերերի ամսական լսարանին, ապա 2014 թվականին այդ ցուցանիշն ավելացել է 26 տոկոսով և կազմել 1,19 մլրդ մարդ:

Facebook-ը աշխարհի խոշորագույն սոցիալական ցանցն է՝ 212 մլրդ դոլար կապիտալացմամբ: Ընկերությունը 2004 թվականին հիմնել է Մարկ Ցուկերբերգը: