Հայ-ռուսական հարաբերությունները չպետք է տուժեն Գյումրիի դեպքերի հետևանքով. Լևոն Մարտիրոսյան

Գյումրիի դեպքերը չպետք է հայ-ռուսական հարաբերություններում սեպեր գցեն: Այս մասին լրագրողների հետ զրույցում հունվարի 29-ին նշեց Ազգային ժողովի ՀՀԿ խմբակցության պատգամավոր Լևոն Մարտիրոսյանը: Նրա խոսքով՝ Ռուսաստանի հետ հարաբերությունները հիմնված են շատ լուրջ ավանդույթների և շահերի վրա:

«Որքան էլ ողբերգական լինի և որքան էլ մեծ ազդեցություն է թողել, չի կարող ստվեր գցել հարաբերությունների վրա: Բազմաթիվ հարցեր կան, որ պետք է հնչեն և պատասխան ստանան: Արդար դատավարություն պետք է տեղի ունենա և մեղավորը կամ մեղավորները պետք է պատասխան տան և պատիժ կրեն: Քննությունը պետք է անցկացվի որակյալ կերպով և որևէ հարց անպատասխան չպետք է մնա»,- «Արմենպրես»-ի փոխանցմամբ՝ նշեց Լևոն Մարտիրոսյանը:

Մարտիրոսյանի խոսքով՝ մենք այսօր այնպիսի վիճակում ենք, որ պետք է Ռուսաստանի հետ ունենանք ավելի սերտ հարաբերություններ՝ և՛ քաղաքական, և՛ տնտեսական, և՛ ռազմական հարցերում: «Պատճառը տարածաշրջանն է և մեզ շրջապատող հարևանները: Մեզ ձեռնտու են այս հարաբերությունները, մենք չենք կարող հրաժարվել դրանից»,- նշեց նա:

Գյումրիում Ավետիսյանների ընտանիքի 6 անդամի սպանությունը տեղի է ունեցել 2015 թվականի հունվարի 12-ին՝ վաղ առավոտյան, ժամը 06:00-ի սահմաններում, իսկ նրանց մահը վրա է հասել հրազենից արձակված կրակոցների հետևանքով։ Ավետիսյանների ընտանիքից ողջ էր մնացել 6 ամսական փոքրիկը՝ Սերյոժա Արմենի Ավետիսյանը, ով կտրող-ծակող գործիքից ստացած վնասվածքներով տեղափոխվել էր բժշկական կենտրոն, որտեղ հունվարի 19-ին մահացել էր։ Մեղադրյալ Վալերի Պերմյակովին ռուս սահմանապահները հայտնաբերել են հայ-թուրքական սահմանը հատելիս և հանձնել 102-րդ ռուսական բազայի հրամանատարությանը: