Օսկարակիր Քևին Սփեյսին կխաղա կատվի մարմնով գործարարի դերը

Քևին Սփեյսին կխաղա Բարրի Զոնենֆելդի «Ինը կյանք» կատակերգությունում: Դերասանը ֆիլմին մասնակցելու պաշտոնական համաձայնություն է տվել, հաղորդում է «Արմենպրես»-ը՝ հղում անելով The Wrap-ին:

Սփեյսիի մարմնավորած հերոսը նկարագրվում է որպես աշխատամոլ գործարար, որը միստիկ միջադեպից հետո բանտարկված է հայտնվում սեփական կատվի մարմնում: Զոնենֆելդի խոսքով՝ «Ինը կյանքը» կլինի ծիծաղելի և հուզական կատակերգություն՝ լավ առևտրային ներուժով: Կինոնկարը Միացյալ Նահանգների վարձույթ դուրս կգա 2016 թվականին:

Քևին Սփեյսին «Օսկար» է ստացել «Գեղեցկություն ամերիկյան ձևով» և «Սովորական կասկածյալները» ֆիլմերում խաղացած դերերի համար: Անցյալ տարի «Թղթե տնակ» սերիալն արտիստին բերել է նրա առաջին «Ոսկե գլոբուսը» և ԱՄՆ-ի դերասանների գիլդիայի մրցանակը:

Այս պահին Սփեյսին զբաղված է Լիզա Ջոնսոնի «Էլվիսը և Նիքսոնը» ֆիլմի նկարահանումներում, որտեղ նա մարմնավորում է ԱՄՆ-ի 37-րդ նախագահ Ռիչարդ Նիքսոնին: