Աշխարհը թևակոխել է նավթի ցածր գների դարաշրջան. Alfa Group

Աշխարհը մտել է ածխաջրածնային հումքի ցածր գների դարաշրջան, և նավթի գնանշումների արագ բարձրացման սպասելու հարկ չկա: Այդ մասին, ինչպես տեղեկացնում է «Արմենպրես»-ը, ասել է LetterOne խմբի և Alfa Group կոնսորցիումի նախագահ Միխայիլ Ֆրիդմանը:

«Մինչ Ռուսաստանում և այլ երկրներում իմ շատ գործընկերներ վիճում են, թե նավթի գները երբ կարող են «հետ ցատկել», ես համոզված եմ, որ մենք մտել ենք նավթի ցածր գների նոր ժամանակաշրջան»,- նշել է Ֆրիդմանը բրիտանական Financial Times թերթի էջերում հրապարակված հեղինակային հոդվածում:

Նա համաշխարհային շուկայում տեղի ունեցող իրադարձությունները համարել է «շուռ տված ալքիմիա», երբ «սև ոսկի» համարվող էներգակիրը, որի գինը պահպանվում էր սահմանափակ առաջարկով, վերածվել է ամենասովորական վառելիքի: Հեղինակը կարծում է, որ նավթի գնանշումների հարցում կարևոր դեր է խաղում հումքի «սահմանափակության ընկալումը»:

ՏԱՍՍ-ի հաղորդմամբ՝ գործարարը հիշեցրել է, որ հումքի շուկայում առաջին անգամը չէ, որ մրրկայնություն է դիտվում. եթե անցյալ դարի 70-ական թվականներին նավթի գները պահպանում էին հարաբերական կայունությունը, ապա «հոգեբանական շոկ» դարձավ ԱՄՆ նավթի արտահանման՝ Սաուդյան Արաբիայի կողմից սահմանված բռնարգելքը, իսկ երբ 1975 թվականին ԱՄՆ-ն սկսեց ռազմավարական պաշարներ կուտակել, դա ավելի ամրապնդեց շուկայում նավթի առաջարկի սղության մասին պատկերացումները: «Նավթը թանկ արժեր, որովհետև մարդիկ կարծում էին, թե դրա պաշարները բավարար չեն»,- ընդգծել է Ֆրիդմանը:

Միևնույն ժամանակ նա նշել է, որ վերջին տարիներին նավթի «գլխապտույտ» գները բնավ նորմալ չէին: