Ադրբեջանում հակահայկականին զուգահեռ հակալեհական արշավ է սկսվել

Ադրբեջանում հերթական հիստերիան է առաջացել այն բանի պատճառով, որ լեհական արտադրության Rafaello կոնֆետների փաթեթավորման վրա հայերեն գրառումն արված է ադրբեջաներենից «առաջ», և սա դեռ քիչ է՝ խախտելով այբուբենը՝ հայերենի և ադրբեջաներենի միջև նշված է վրացերեն:

Ղարաբաղյան պատերազմի ադրբեջանցի վետերանների qaziler.az նորաստեղծ կայքն իր՝ «Մեզ, մեր լեզուն ատող լեհ արտադրողներից ամեն ինչ սպասելի է» վերտառությամբ հոդվածում այդ առնչությամբ գրում է. «Նշանակում է, հայերին և վրացիներին մեզնից առաջ են տարել նրանց քրիստոնյա լինելու համար: Նշանակում է, քրիստոնյաներին պաշտող, մուսուլմաններին և թուրքերին ատող լեհ արտադրողները, այսինքն՝ Ferrero ընկերության լեհական բաժանմունքի ղեկավարները դրանով ցույց են տվել Ադրբեջանի նկատմամբ ունեցած իրենց ատելությունը», -գրում է կայքը՝ նշելով. «Ինչու՞ պետք է պետք է մենք մեր փողերը ծախսենք հայամետ, քրիստոնյաներին գերակա համարող լեհերին հարստացնելու համար»:

«Ինչո՞ւ պետք է Ադրբեջանում հայերեն գրառված որևէ ապրանք վաճառվի, դա անթույլատրելի է: Նշանակում է, այստեղ լեհական՝ հակաթուրքական, իսլամատյաց այդ կոնֆետները Ադրբեջան բերելու մեջ այլ նպատակ կա: Ո՞վ գիտի, եթե Rafaello-ի լեհ արտադրողները Ադրբեջանի նկատմամբ նման ատելություն են դրսևորում, ուրեմն ինչ-որ մի «X» ժամանակ այդ կոնֆետների մեջ նրանք կարող են ռադիոակտիվ նյութեր կամ այլ թույներ մտցնել և ուղարկել Ադրբեջան ու թունավորել մեզ: Չէ՞ որ մեզ ու մեր լեզուն ատող լեհ արտադրողներից ամեն բան սպասելի է», -համոզմունք է հայտնում կայքը:

Հոդվածագիրը նշում է, որ մեղադրում է Ադրբեջանին ատող՝ հայամետ և քրիստոնյաներին պաշտող լեհերի կոնֆետները Ադրբեջան բերող գործարարներին: «Ամբողջ աշխարհը գիտի Ադրբեջանի որոշ գործարարների անգրագիտության, ազգային ինքնագիտակցությունից զուրկ լինելու, իր ստամոքսի համար հային և մեր այլ ազգային թշնամիներին քծնելը…», -եզրահանգում է կայքը: