ՆԱՏՕ-ում 2 մլրդ դոլար են գնահատել ՌԴ-ի կորուստները 1 դոլարով նավթի գնի անկման դեպքում

Աշխարհ 29 Հունվար, 2015 20:44

Ռուսաստանը 2 մլրդ դոլար է կորցնում 1 դոլարով նավթի գնի անկման դեպքում և այս տարի կարող է շուրջ 150 մլրդ դոլար կորցնել նավթի ցածր գների և պատժամիջոցների պատճառով: Ինչպես տեղեկացնում է «Արմենպրես»-ը, այս կարծիքը հայտնել է ՆԱՏՕ-ի գլխավոր քարտուղարի՝ անվտանգության նոր սպառնալիքների գծով օգնականի տեղակալ Ջեյմի Շին:

«Ռուսաստանը ներկայում 2 մլրդ դոլար եկամուտ է կորցնում 1 դոլարով նավթի գնի անկման դեպքում: Եթե գները մնան ներկայիս մակարդակի վրա՝ շուրջ 50 դոլար կամ ավելի ցածր, Ռուսաստանը միայն այս տարի կօգտագործի բարեկեցության իր սուվերեն ֆոնդի մեծ մասը՝ շուրջ 70 տոկոսը, և ավելի շատ՝ հաջորդ տարիների ընթացքում: Նա ստիպված կլինի «ընկղմվել» կենսաթոշակային ֆոնդերի մեջ, «բարձը», որն այժմ նա ունի, շատ արագորեն կանհետանա»,-ասել է Շին՝ ելույթ ունենալով Եվրախորհրդարանում կայացած քննարկումների ընթացքում:

Նրա խոսքով՝ Ռուսաստանը վաղ թե ուշ հարկ կլիներ բախվել այդ խնդրին, հարցն այժմ այն է, թե նավթի ներկայիս գինը արդիականացման կդրդի արդյոք Ռուսաստանին: «Արդյոք դա կդառնա արդիականացման խթան կամ այն բանի հաստատումը, որ, օրինակ, այս տարի Ռուսաստանը շուրջ 150 մլրդ դոլար կկորցնի պատժամիջոցների և նավթի ցածր գների հետևանքով, Ռուսաստանին ավելի բարեսիրտ չի դարձնի, այլ, ընդհակառակը, նրան անկյուն կքշի, որտեղ նրա վարքագիծը կարող է դառնալ ավելի ազգայնամոլական ու ագրեսիվ»,-ասել է Շին, հաղորդել է ՌԻԱ Նովոստին: