ԵԱՀԿ-ի նախագահը պահանջել է դադարեցնել մարտական գործողությունները Ուկրաինայի արևելքում

ԵԱՀԿ-ի գործող նախագահ, Սերբիայի փոխվարչապետ և ԱԳ նախարար Իվիցա Դաչիչը Մինսկի ձևաչափով շուտափույթ հանդիպման հույս է հայտնել, տեղեկացնում է «Արմենպրես»-ը՝ հղում անելով ԵԱՀԿ-ի հաղորդագրությանը:

«Ես կոչ եմ անում հակամարտության մեջ ներքաշված բոլոր կողմերին՝ դադարեցնել մարտական գործողությունները և վերադառնալ բանակցությունների սեղանի շուրջ: Միջազգային հանրակցությունն ակնկալում է, որ Մինսկի փաստաթղթերն ստորագրած կողմերը կհարգեն իրենց պարտավորությունները և հակամարտության խաղաղ լուծման ճանապարհ կհարթեն»,- հաղորդագրության մեջ մերջբերված է Դաչիչի խոսքը:

Հայտարարության մեջ նշվում է, որ ԵԱՀԿ-ի նախագահն ակնկալում է Մինսկի փաստաթղթերն ստորագրած կողմերի շուտափույթ հանդիպում: Խոսքը վերաբերում է եռակողմ շփման խմբի անդամներին՝ Կիևում ՌԴ-ի դեսպան Միխայիլ Զուրաբովին, Ուկրաինայի երկրորդ նախագահ Լեոնիդ Կուչմային, ԵԱՀԿ-ի նախագահի հատուկ ներկայացուցիչ Հայդի Տալյավինիին և ինքնահռչակ Դոնեցկի և Լուգանսկի ժողովրդական հանրապետությունների ղեկավարներին:

Ավստրիայի ԱԳ նախարար Սեբաստիան Կուրցն ավելի վաղ Բրյուսելում հայտարարել է, որ Մինսկի ձևաչափով հանդիպումը սպասվում է հունվարի 30-ին: Ընդսմին Ուկրաինայի նախագահ Պյոտր Պորոշենկոն եռակողմ շփման խմբի ներկայացուցիչների հետ կայացած հանդիպմանը կոչ է արել նրանց՝ կոնսուլտացիաներ անցկացնել ԴԺՀ-ի և ԼԺՀ-ի ղեկավարների հետ:

ՌԻԱ Նովոստիի հաղորդմամբ՝ ԼԺՀ-ի ղեկավար Իգոր Պլոտնինսկին ասել է, որ Լուգանսկի և Դոնեցկի ժողովրդական հանրապետությունների ղեկավարները պատրաստ են Դոնբասի իրադրության կարգավորման շուրջ շփման խմբի բանակցություններին, եթե դրան մասնակցի Ուկրաինայի պաշտոնական ներկայացուցիչը: