Տոնավաճառների աշխատակիցներն ԱԺ շենքի դիմաց են

Այս պահին Ազգային Ժողովի շենքի դիմաց բողոքի ակցիա են անցկացնում Երևանի տոնավաճառների աշխատակիցները, փոքր և միջին բիզնեսի ներկայացուցիչները, ովքեր պայքարելու են եկել «Շրջանառության հարկի մասին» օրենքի դեմ։

Հիշեցնենք, որ օրեր առաջ՝ կառավարության դիմաց բողոքի ակցիայի ժամանակ, ցուցարարներին միացել էին ԲՀԿ պատգամավորներ Վահե Էնֆիաջյանը, Միքայել Մելքումյանը և Վահան Բաբայանը:

Միքայել Մելքումյանը հայտարարել էր, որ եռյակը որոշել է ՓՄՁ-ների հարցով երկուշաբթի օրն արտահերթ նիստ հրավիրել, իսկ բարձրացված խնդիրը ԲՀԿ առաջնորդ Գագիկ Ծառուկյանի ուշադրության կենտրոնում է և նա իր աջակցությունն է հայտնում հավաքված քաղաքացիներին:

Միևնույն ժամանակ, պատգամավորները նշել էին, որ հարցը քննարկման կդնեն ԱԺ նիստում:

Հիշեցնենք նաև, որ վարչապետ Հովիկ Աբրահամյանի գլխավորությամբ օրեր առաջ տեղի է ունեցել ՀՀ կառավարության արտահերթ նիստ: Գործադիրը քննարկել և հավանություն է տվել «Շրջանառության հարկի մասին» ՀՀ օրենքում փոփոխություն կատարելու մասին» ՀՀ օրենքի նախագծին:

Վարչապետ Հովիկ Աբրահամյանը տեղեկացրել է, որ Սերժ Սարգսյանի մոտ տեղի ունեցած խորհրդակցության արդյունքում որոշվել է հետաձգել «Շրջանառության հարկի մասին» ՀՀ օրենքով սահմանված ապրանքների ձեռքբերման, փաստաթղթավորման պահանջի գործողությունը մինչև հուլիսի 1-ը: «Միաժամանակ, քննարկումների արդյունքում որոշվեց այդ ընթացքում մշակել այնպիսի օրենսդրական կարգավորումներ, որոնք մինչև 58 մլն 350 հազար դրամ տարեկան շրջանառություն ունեցող տնտեսվարողների համար կստեղծեն առավել բարենպաստ պայմաններ»,- նշել է կառավարության ղեկավարը:

Նախագծով առաջարկվում է «Շրջանառության հարկի մասին» ՀՀ օրենքով սահմանված ապրանքների ձեռքբերման, փաստաթղթավորման պահանջի գործողության ժամկետը, որը սահմանված էր մինչև փետրվարի 1-ը, հետաձգել մինչև հուլիսի 1-ը: Նախագիծը ճանաչվել է անհետաձգելի և ներկայացվել Ազգային ժողով: