Բրազիլուհին գեղեցկության մրցույթում ուժով խլել է մրցակցուհու թագը

Բրազիլիայում Miss Amazonas գեղեցկության մրցույթի մասնակից Շեյսլանե Հայալան մրցույթի հաղթող Քերոլ Տոլեդոյի գլխից պոկել է թագը վերջինիս պարգևատրումից անմիջապես հետո, հաղորդում է «Արմենպրես»-ը՝ հղում անելով The Daily Star-ին: Հայալան իր արարքը բացատրել է նրանով, որ Տոլեդոն, իր կարծիքով, «գնել է տիտղոսը»:

Միջադեպը տեսախցիկով նկարահանել են հանդիսատեսները. համապատասխան տեսահոլովակը հրապարակվել է Ցանցում: Դրանում երևում է, որ սկզբում երկրորդ տեղը զբաղեցրած Հայալան ձևացրել է, թե ուրախ է հաջողակ մրցակցուհու համար. նա գրկել է թագն ստացած Տոլեդոյին, բայց մի քանի վայրկյան հետո բռնել է զարդը, այն պոկել մրցակցուհու գլխից և նետել բեմի վրա:

«Ես ներողություն եմ խնդրում, եթե որևէ մեկին դուր չի եկել իմ վարքագիծը, բայց ես արել եմ այն, ինչ սիրտս է հուշել»,-ավելի ուշ հայտարարել է կռվարար աղջիկը:

Տուժածի, ինչպես նաև ժյուրիի անդամների արձագանքի և մեկնաբանությունների մասին հրատարակությունը չի գրում:

2014 թվականին Շեյսլանե Հայալան Բրազիլիան ներկայացրել է Բաքվում անցկացված Miss Globe International մրցույթում, որտեղ նա նույնպես զբաղեցրել է երկրորդ տեղը: