Հայաստանում բնական հավելաճը գերազանցել է նախորդ տարիների ցուցանիշը

Հայաստանում 2014 թվականին գրանցվել է 43 հազար 183 ծնունդ, որը նախորդ տարվա համեմատ ավելի է 3.3 տոկոսով:

Այս մասին լրագրողների հետ հանդիպման ժամանակ տեղեկացրեց Հայաստանի ազգային վիճակագրական ծառայության մարդահամարի և ժողովրդագրության բաժնի պետ Կարինե Կույումջյանը` ընդգծելով, որ ծնելիության բարձր աճ է գրանցվել հատկապես Երևանում և Շիրակի մարզում: «Հանրապետական միջին ցուցանիշից ցածր աճ է արձանագրվել Վայոց Ձորի, Տավուշի և Սյունիքի մարզերում: Այս մարզերը նաև առաջնային են մահվան առավել բարձր ցուցանիշով»,- «Արմենպրես»-ի հաղորդմամբ` ասաց նա:

Կարինե Կույումջյանը նշեց, որ նախորդ տարի գրանցվել է մահվան 27 հազար 872 դեպք, որը 2.5 տոկոսով ավելի է 2013 թվականից: «Չնայած դրան, զգալի նվազել է մանկական մահացության թիվը: Երեխաների մահացության դեպքերը նվազել են 8 տոկոսով, իսկ մեռելածնության դեպքերը փոքր-ինչ ավելացել են` կազմելով 751 դեպք նախորդ տարվա 711 դեպքի համեմատ»,- ասաց նա:

Ազգային վիճակագրական ծառայության ներկայացուցիչը տեղեկացրեց, որ մահվան պատճառների ցանկում առավել տարածված են չարորակ գոյացությունների, շնչառական, մարսողական և սրտանոթային օրգանների հիվանդությունները: