Իրանն առաջարկել է ադրբեջանական և թուրքմենական գազն իր տարածքով փոխադրել Թուրքիա

Իրանի ազգային գազային ընկերությունը (NICG) հայտարարել է թուրքմենական և ադրբեջանական գազն իր տարածքով Թուրքիա փոխադրելու, այնտեղից էլ Եվրոպա հասցնելու իր պատրաստակամության մասին:

Ինչպես հաղորդում է «Արմենպրես»-ը, NICG-ի միջազգային բաժնի տնօրեն Ազիզուլլա Ռամազանին այդ առնչությամբ հայտարարել է, որ տնտեսական իմաստով Իրանը հանդիսանում է ամենաշահավետ միջանցքը ադրբեջանական և թուրքմենական գազը Եվրոպա փոխադրելու համար:

NICG-ն Իրանում զբաղվում է գազի մատակարարմամբ և սպառողների միջև բաշխմամբ: NICG-ի գազատար ցանցն Իրանում կազմում է 30 հազար կիլոմետր, և այդ ցուցանիշով ընկերությունը հանդիսանում է համաշխարհային առաջատար:

Ադրբեջանի և Թուրքմենստանի պաշտոնական անձինք դեռևս չեն արձագանքել Իրանի այդ նախաձեռնությանը:

Թուրքմենական գազը Կասպից ծովի հատակով Ադրբեջանի տարածքով Անդրկասպյան խողովակաշարի միջոցով Եվրոպա հասցնելու նախագիծը, որը պաշտպանում են Եվրամիությունն ու ԱՄՆ-ը, գոյություն ունի արդեն շատ տարիներ: Սակայն այդ նախագծին խանգարող լուրջ քաղաքական խոչընդոտներ կան: Իրանն ու Ռուսաստանը բազմիցս հայտարարել են, որ Կապից ծովի հատակով խողովակաշարի շինարարությանը դեմ են «բնապահպանական պատճառներով»: Անցյալ շաբաթ Աշխաբադում Անդրկասպյան խողովակաշարին նվիրված խորհրդատվություններ են անցկացվել Ադրբեջանի, Թուրքիայի և Թուրքմենստանի ԱԳՆ ղեկավարների միջև:

Եթե Իրանին հաջողվի միջուկային ծրագրի շուրջ համաձայնություն ձեռք բերել Արևմուտքի հետ, ապա գազի փոխադրման հարցում իրավիճակն արմատապես կփոխվի, և իրանական գազի հսկայական պաշարները հասանելի կդառնան եվրոպական սպառողի համար: Ժամանակին ադրբեջանական գազը Իրանով Եվրոպա փոխադրելու տարբերակը չի իրագործվել աշխարհաքաղաքական պատճառներով' չնայած Իրանով փոխադրումը շատ ավելի էժան կլիներ: