Երևանում նախորդ տարի կառուցվել է 1000 թեքահարթակ

Երևանի քաղաքապետարանը կրկնապատկել է հաշմանդանություն ունեցող անձանց խնդիրների լուծմանը տրամադրվելիք գումարի չափը, և միայն նախորդ տարի մայրաքաղաքում կառուցվել է շուրջ 1.000 թեքահարթակ, հարմարեցվել են այգիներն ու վերելակները:

«Քաղաքը հարմարեցվում է հաշմանդամություն ունեցող անձանց համար, և հասարակական գիտակցությունը զարգանում է: Փետրվարից կգործեն ավտոբուսներ, որոնցում տեղադրվել են վերելակներ հաշմանդամություն ունեցող անձանց համար»,- «Արմենպրես»-ի մամուլի սրահում փետրվարի 3-ին կայացած ասուլիսին ասաց Երևանի քաղաքապետ Տարոն Մարգարյանի օգնական Սամվել Մերթարջյանը' հավելելով, որ այս տարի ևս տասը ավտոբուս կհարմարեցվեն հաշմանդամություն ունեցող անձանց խնդիրներին:

«Հայ մայրեր» ՀԿ նախագահ Նարինե Մանուկյանն էլ նշում է, որ եթե մայրաքաղաքում որևէ տեղաշարժ կա այս առնչությամբ, ապա մարզերում վիճակն ավելի սարսափելի է: «Չկա հարմարավետություն, չկան թեքահարթակներ, և նաև առկա է անհանդուրժողականության խիստ մթնոլորտը»,- ասաց Մանուկյանը:

«Հայ մայրեր»-ը, որ զբաղվում է մանկական գլխուղեղային կաթված ունեցող երեխաների հիմնախնդիրներով, ներկա դրությամբ աջակցում է 150 երեխայի: Մանուկյանի խոսքով՝ պետությունը տրամադրում է գումար ընդամենը երկու ամսվա վերականգնողական բուժման համար, սակայն դա բավարար չէ:

«Որպեսզի փոքրիկի մոտ լուրջ փոփոխություններ նկատվեն, շատ կարևոր է, որ եռաստիճան վերականգնողական թերապիաները լինեն շարունակական: Այս առումով շատ կարևոր է ոչ միայն պետական հոգածությունը, այլև մասնավոր կազմակերպությունների հետ աշխատանքը»,- ասաց Մանուկյանը: