«Ովքեր մանդատով իրենց բիզնեսը չեն պաշտպանել, կինոսցենարիստ են դարձել»

Ազգային ժողովը հերթական քառօրյայի երկրորդ նիստին քննարկեց «Շրջանառության հարկի մասին ՀՀ օրենքում փոփոխություն կատարելու մասին» ՀՀ օրենքի նախագիծը: Ելույթով հանդես եկավ «Ժառանգություն» խմբակցության պատգամավոր Ռուբեն Հակոբյանը, ով «լավ մշակույթ» համարեց երեկ վարչապետի՝ Ազգային ժողով գալը:

«Հանդիպմանը ֆիքսեցինք ժամկետ, որ հաջորդ քառօրյայում համատեղ մենք կբերենք նախագիծ: Լավ կլինի, որ մեկտեղվեն մեր մտահոգությունները, մեր մոտեցումները: Մենք ուզում ենք, որ օրենքում դիմինանտ տեղ հատկացնենք կամավորության սկզբունքին: Քաղաքակա՞ն դաշտում պետք է լուծվի այս հարցը, թե՞ տնտեսական, իմ կարծիքով՝ քաղաքական: Ունենք 10-15 մոնոպոլիստ, ովքեր դուրս են օրենքի դաշտից, որոնց վրա որևէ օրենք չի ազդում և անում են այն, ինչ ուզում են. նրանք հիմնականում ներկրողներն են: Նրանք «սպոնսերը» բարձրադիր իշխանություններն են: Մեզ մոտ ներկրումը 4 անգամ ավելի շատ է, քան արտահանումը, դա նշանակում է, որ մենք խոսում ենք մեռնող տնտեսության մասին: Այս դեպքում ներկրողները կարևոր դեր ունեն, նրանք կա՛մ մեզ թթվածին տալիս են, կա՛մ փակում են: Նրանք այսօր փակում են»,- նկատում է պատգամավորը:

Ռուբեն Հակոբյանը խորհուրդ տվեց միասին գնալ Գավառի, Տավուշի ամենավերջին գյուղերը և այնտեղ հարցնել, թե ովքեր են մեր երկրի մոնոպոլիստները: Մարդիկ շուտասելուկի նման անգիր կասեն նրանց: «Բա էդքան մենք կառույցներ ունենք, որ պետք է այդ ամենը իմանան, չգիտե՞ն, ո՛չ, դուխները չի հերիքում, որովհետև նրանք բարձրադիր իշխանությունների կողմից են երաշխավորված:

Ովքեր չեն մտել խորհրդարան և մանդատով իրենց բիզնեսը պաշտպանել, հետագայում կա՛մ կինոսցենարիստ են դարձել, կա՛մ չգիտեմ՝ որտեղ են հայտնվել: Եկեք հարգենք մեզ: Ի՞նչ կարող ենք մենք անել, եթե իշխանությունը քաղաքական կամք ունի, թող հավաքի իր 10-15 հոգուն, ասի՝ հերիք է ինչքան կերանք, կործանվում ենք: Մեր արտադրանքը չի արտադրվում, որպեսզի դառնա ազգային կապիտալ, մենք վախեցրել ենք աշխարհին բոլոր կապիտալներին, որ այստեղ ինվեստիացիա անեն, որովհետև այստեղ «բոբոյական» դաշտ ենք ստեղծել: Մենք գիտենք և՛ կաշառատուին, և՛ կաշառք վերցնողին, քաղաքական հովանավորողներին, ազգ ու բարեկամով գիտենք»,- ասաց Ռուբեն Հակոբյանը: 

Պատգամավորը զգուշացրեց նաև, որ եթե կոմպորմիսի չգան այս հարցում, 4 քաղաքական ուժերն արտահերթ նիստ կհրավիրեն: