ԱԺ-ն հաստատեց ժամանակավոր հաշվիչ հանձնաժողովի կազմը

Ազգային ժողովը քվեարկությամբ հաստատեց հերթական նստաշրջանի հաշվիչ հանձնաժողովի կազմը:

«Արմենպրես»-ի հաղորդմամբ՝ Ազգային ժողովի նախագահ Գալուստ Սահակյանը քվեարկությունից առաջ հայտարարեց, որ բոլոր խմբակցությունների համատեղ քննարկումների արդյունքում հաջողվել է համաձայնության գալ հաշվիչ հանձնաժողովի կազմի հարցում: «Ըստ այդմ՝ հաշվիչ հանձնաժողովում Հանրապետական խմբակցությունը կունենա 6, ԲՀԿ-ն 2, իսկ մնացած խմբակցությունները՝ մեկական ներկայացուցիչ»,- նշեց Սահակյանը:

Համապատասխան որոշման նախագիծը դրվեց քվեարկության, որին կողմ քվեարկեց 103, դեմ՝ 4, ձեռնպահ՝ 3 պատգամավոր:

Քվեարկությունից առաջ ելույթ ունեցան տարբեր խմբակցությունների ներկայացուցիչներ: ԲՀԿ խմբակցության քարտուղար Նաիրա Զոհրաբյանն ասաց, որ այս իրավիճակում առաջարկը բավականաչափ հավասարակշռություն պահպանում է, ուստի ԲՀԿ-ն կողմ կքվեարկի որոշման նախագծին:

«Ժառանգություն» խմբակցության Ռուբեն Հակոբյանն ընդգծեց, որ իրենք սա համարում են ձեռքբերում, ուստի կողմ են քվեարկելու:

ՀԱԿ խմբակցության պատգամավոր Արամ Մանուկյանն էլ ընդգծեց, որ ՀԱԿ խմբակցությունը կողմ է հին տարբերակին, սակայն այս տարբերակին էլ դեմ չի քվեարկելու: Նա տեղեկացրեց, որ ՀԱԿ խմբակցությունը որոշման նախագծին ձեռնպահ կքվեարկի:

Փետրվարի 2-ի նիստում խորհրդարանը չէր կարողացել հաստատել հաշվիչ հանձնաժողովի կազմը, քանի որ ԱԺ նախագահ Գալուստ Սահակյանի և ՀՅԴ խմբակցության պատգամավոր Արծվիկ Մինասյանի ներկայացրած որոշման նախագծերը քվեարկությամբ մերժվել էին: ԱԺ նախագահ Գալուստ Սահակյանի ներկայացրած որոշման նախագծով առաջարկվում էր հաշվիչ հանձնաժողովի կազմում ընդգրկել ՀՀԿ-ից 7, մնացած խմբակցություններից մեկական ներկայացուցիչ, իսկ Արծվիկ Մինասյանն առաջարկում էր ընդունել հին տարբերակը: