Անցած տարի բանակում անհամեմատ կրճատվել է հանցագործությունների և իրավախախտումների թիվը

ՀՀ պաշտպանության նախարարության հաշվարկներով, հակառակորդի գործողություններին դիմագրավելու արդյունքում 2015 թվականի հունվարին վերջինիս պատճառվել է ավելի քան երեսուն զոհ:

Ինչպես հաղորդում է «Արմենպրես»-ըˋ փետրվարի 3-ին այս մասին հայտնեց Պաշտպանության նախարարի խորհրդական, նախարարին առընթեր հասարակական խորհրդի նախագահ Գեղամ Հարությունյանըˋ նշելով, որ ՀՀ զինված ուժերի տված կորուստները յոթն են, որը նախորդ տարվա հունվարի համեմատ մոտ երեք անգամ շատ է: «Սակայն ճիշտ կլիներ այս տարվա հունվարի իրադարձությունները և դրանց արդյունքում մեր ունեցած կորուստները համեմատել 2014 թվականի հուլիս-օգոստոսի երկու շաբաթ վա իրադարձությունների և զոհերի հետ: Քանզի իրենց բնույթով և ինտենսիվությամբ, ոտնձգությունների հաճախակիությամբ դրանք համադրելի են հուլիս-օգոստոսյան երկու շաբաթվա հետ»,- ասաց Հարությունյանը:

Սահմանային միջադեպերի ընթացքում եղել են նաև նռնականետերի և ականանետերի օգտագործման դեպքեր, բայց հիմնական անհանգստացնող պայմանները, ՊՆ խորհրդականի խոսքով, շարունակում են մնալ սահմանի ամբողջ գծով ծավալված դիպուկահարների պատերազմը և դիվերսիոն ներթափանցման գործողություններն ու փորձերը:

«Առաջնագծի մեր սպաները և զինվորները զգոն են և կարձագանքեն հակառակորդի ցանկացած ոտնձգության»,- ընդգծեց նա:

Նաև սահմանային միջադեպերով պայմանավորվածˋ 2014 թվականին, 2013-ի համեմատ, նվազել է բանակի ներսում միջանձնային հարաբերությունների հողի վրա տեղի ունեցած հանցագործությունների թիվը: Սպանության և ինքնասպանության հասցնելու դեպքերը 2014 թվականին կրճատվել են 67 տոկոսով: Իրավակարգի ամրությունը խորհրդանշող կամ այդ ոլորտում զարգացում բնութագրող ցուցանիշները նույնպես բարելավվել են: Հիավանդացության հետևանքով մահերը կրաճատվել են 40 տոկոսով, բռնարարքները և ծեծկռտուքների դեպքերը կրճատվել են 15 տոկոսով, ինքնավնասումների դեպքերըˋ 11 տոկոսով:

Գեղամ Հարությունյանը նկատեց, որ սահմանային լարվածության օրերին համախմբման գործընթացներ են տեղի ունեցել բանակի ներսում: Տեղի է ունեցել նաև զինվորների համախմբում սպաների շուրջ: