«Տո խելոք ջան, քո ի՞նչ խելքի գործն է դա». Շարմազանով

Հայաստանի Հանրապետական կուսակցությունն անթույլատրելի է համարում, որ հայաստանյան ներքաղաքական հարցերին, խնդիրներին, տարբեր ուժերի ներքաղաքական ու ներհայաստանյան ծրագրերին մասնակից են դարձնում Արցախի Հանրապետությունը: Այս մասին ՀՀԿ ԳՄ նիստի ավարտից հետո լրագրողների հետ զրույցում հայտարարեց ՀՀ ԱԺ փոխնախագահ, ՀՀԿ խոսնակ Էդուարդ Շարմազանովը:

«Արցախը դե ֆակտո անկախ հանրապետո ւթյուն է՝ իր ընտրված նախագահով, ԱԺ-ով, սահմանադրությամբ, և հայաստանյան խնդիրներին ներքաշել Արցախը, մեղմ ասած, ճիշտ չէ: Երբեք մենք մեր խնդիրներն Արցախ չենք տարել, այնտեղ չենք ներկայացել որպես այս կամ այն կուսակցության անդամ, ներկայացել ենք որպես օրենսդիր մարմնի անդամ: Տեղի ունեցածը տհաճ է, ու նրանք անում են քայլ, որը ՀՀ-ի դեմ է: Ի՞նչ գործ ունեին Արցախում: Պայքարում ես, արի, Օպերայում պայքարի»,-  նշեց Շարմազանովը:

Անդրադառնալով Բերձորում ԼՂՀ ոստիկանության գործողություններին՝ Շարմազանովն ընդգծեց, որ Արցախի ոստիկանությունը տարածել է հայտարարություն և այնտեղ ամեն ինչ ասված է, ինչին ինքն ավելացնելու ոչինչ չունի:

Շարմազանովն անդրադարձավ «Հիմնադիր խորհրդարանի» անդամներից մեկի արած հայտարարությանը, թե հակառուսական տրամադրություններ տարածելու էին գնում Արցախ' նշելով. «Տո խելոք ջան, քո ի՞նչ խելքի գործն է դա: Այլ երկրի քաղաքացին ի՞նչ իրավունք ունի այլ երկրի տրամադրություններ տարածելու այլ երկրում»: