Լրացել է մոլորակի ամենատարեց տղամարդու 112-ամյակը

Մոլորակի ամենատարեց տղամարդը՝ ճապոնացի Սակարի Մոմոյին փետրվարի 5-ին նշում է իր ծննդյան 112-րդ տարեդարձը: Ինչպես տեղեկացնում է «Արմենպրես»-ը, նա օրը դիմավորել է իր ընտանիքի անդամների շրջապատում Տոկիոյի հատուկ բուժհաստատություններից մեկում, որտեղ գտնվում է մշտական խնամքի ներքո:

Մոմոյիի հարազատները հայտնել են, որ, հաշվի առնելով նրա պատկառելի տարիքը, այդ օրը հատուկ որևէ միջոցառում ծրագրված չէ: «Մեզ համար կարևոր ու ուրախալի է այն, որ մեր ընտանիքի մեծարգո ղեկավարը հոգեկան խաղաղ վիճակում է»,-ասված է մամուլի համար արված մեկնաբանության մեջ, որը հրապարակել են ազգականները:

Ինչպես նշում է ՏԱՍՍ-ը, օգոստոսին Գիննեսի ռեկորդների գրքի կոմիտեն Մոմոյիին պաշտոնապես ճանաչել է մոլորակի ամենատարեց տղամարդը: Այդ կապակցությամբ ռեկորդակրին հանձնվել է պատվավոր դիպլոմ:

Սակարի Մոմոյին ծնվել է 1903 թվականին Ճապոնիայի Հոնսյու գլխավոր կղզու հյուսիս-արևելքի Ֆուկուսիմայի պրեֆեկտուրայում: Ամբողջ կյանքի ընթացքում նա ագրոքիմիա է դասավանդել, ինչպես նաև եղել է մի քանի դպրոցների տնօրեն: Ազգականների խոսքով՝ ռեկորդակիրը պահպանել է մտքի պայծառությունը, ինքնուրույն գրքեր է կարդում և հետևում է մարզական հաղորդումներին: Մոմոյին, մասնավորապես, գրավում է բեյսբոլը և սումոն:

Ի դեպ, Ճապոնիայի Օսակա քաղաքում ապրում է նաև մոլորակի ամենատարեց կինը՝ 116-ամյա Միսաո Օկավան: