Երևանի դպրոցներում մեկնարկել է առարկայական օլիմպիադաների տարածքային փուլը

Երևանի բոլոր դպրոցներում փետրվարի 3-ից մեկնարկել է դպրոցականների առարկայական օլիմպիադաների տարածքային փուլը։ Աշակերտների գիտելիքների և ուսման առաջադիմության ամենամյա ստուգատեսին մասնակցում են մայրաքաղաքի բոլոր դպրոցները՝ հիմնական, միջնակարգ, ավագ, մասնավոր։

Դպրոցական օլիմպիադաներ ը, որոնցում ընդգրկված են 16 առարկաներ, անցկացվում են 3 փուլով։ Տարածքայինին մասնակցում են դպրոցական փուլում հաղթած երեխաները. դպրոցական փուլն անցկացվել է դեկտեմբեր-հունվար ամիսներին։

Ըստ կարգի՝ «Մաթեմատիկա», «Ֆիզիկա», «Կենսաբանություն», «Աստղագիտություն», «Ինֆորմատիկա» առարկայական օլիմպիադաների առաջին փուլը բոլոր դպրոցներում առցանց է անցկացվում՝ միասնական թեստով։

Երևանի քաղաքապետարանի աշխատակազմի հանրակրթության վարչության պետ Գայանե Սողոմոնյանը և վարչության աշխատակիցները օլիմպիադաների օրերին այցելում են դպրոցներ՝ ընթացքին ծանոթանալու և հետևելու։ Հանրակրթության վարչության պետը նշել է, որ օլիմպիադաների անցկացման կարգի խախտում փետրվարի 5-ի դրությամբ դեռևս չի արձանագրվել։ «Աննախադեպ մեծ է մասնակցությունը. տարի առ տարի ավելի բարձր արդյունքներն ենք գրանցում թե՛ մասնակցության, թե՛ աշակերտների պատրաստվածության, թե՛ անցկացման որակի»,- ընդգծել է Գայանե Սողոմոնյանը:

Դպրոցականների առարկայական օլիմպիադաների տարածքային փուլը կավարտվի փետրվարի 18-ին։ Դպրոցականների առարկայական օլիմպիադաների տարածքային փուլը հաղթահարած աշակերտները կմասնակցեն մարզային փուլին, որը կանցկացվի փետրվարի 21-ից՝ ըստ ՀՀ ԿԳ նախարարության հաստատած ժամանակացույցի։