Ճշտվել է Գյումրիում զինտեխնիկայի և զինվորականների տեղաշարժման ճանապարհային քարտեզը

Գյումրու քաղաքապետ Սամվել Բալասանյանը փետրվարի 5-ին հերթական հանդիպում-խորհրդակցությունն է անցկացրել Գյումրիում ռուսական զինվորական հրամանատարության հետ, որին ներկա էին ռուսական սահմանապահ զորքերի հրամանատար Անատոլի Շչադրինը, ռուսական 102-րդ ռազմաբազայի հրամանատար Անդրեյ Ռուզինսկին և այլ զինվորականներ:

Ավելի քան երկու շաբաթ առաջ տեղի ունեցած խորհրդակցության ժամանակ քննարկված հարցրերի շրջանակներում որոշվել էր համապատասխան աշխատանքներ տանել՝ առկա լարվածության նվազեցման և իրավիճակի կարգավորման ուղղությամբ: Ինչպես «Արմենպրես»-ին տեղեկացրին Գյումրու քաղաքապետարանի մամուլի գրասենյակից, այս հանդիպման ընթացքում ներկաները քննարկել են արդեն իրականացված միջոցառումների և տիրող իրավիճակի մասին որոշ հարցեր, միաժամանակ՝ անդրադարձ է եղել վերջերս մամուլում ակտիվ քննարկումների արժանացած Գյումրիում զինտեխ նիկայի և զինվորականների տեղաշարժման ճանապարհային քարտեզին: Նախնական պայմանավորվածությամբ, մշակված քարտեզը, երկու կողմերի համատեղ աշխատանքի արդյունքում, որոշակի ճշտումների է ենթարկվել: Ռուսական կողմը ներկայացրել է ներքին կարգապահական ուժեղացված վերահսկողությանն առնչվող մի շարք հարցեր ևս« իսկ քաղաքապետ Սամվել Բալասանյանն իր հերթին պատրաստակամություն է հայտնել աջակցելու ցանկացած խնդրի ուղղությամբ համապատասխան միջոցառումների ձեռնարկման գործում:

Արմենուհի Մխոյան